काठमाडौं । नेपाल अटोमोबाइल इम्पोर्टर्स एन्ड म्यानुफ्याक्चरर्स एसोसिएसन (नाइमा) ले यही २०८२ सालको श्रावण २१ देखि २५ गतेसम्म काठमाडौंको भृकुटीमण्डपमा “नेपाल मोबिलिटी एक्स्पो २०२५” आयोजना गर्न लागेको छ। अटोमोबाइल क्षेत्रका सम्पूर्ण पक्षहरूलाई समेट्ने गरी आयोजना हुने यो प्रदर्शनीको स्टल बुकिङ वैशाख २२ देखि २९ गते (मे ५ देखि मे १२, २०२५) सम्म खुला रहनेछ।

उक्त एक्स्पोले सवारीसाधन निर्माता, डिलर, वितरक, उपभोक्ता तथा नीतिनिर्माता लगायत सबै सरोकारवालाबीच समन्वय र सहकार्यको अवसर प्रदान गर्ने अपेक्षा गरिएको छ। अटोमोटिभ प्रविधि, डिजाइन, र दिगोपनमा भएका नवीनतम उपलब्धिहरू एकैथलोमा प्रदर्शन गरिने बताइएको छ।

प्रदर्शनीमा स्टल बुकिङ लटरी प्रणालीबाट पारदर्शी तरिकाले बाँडफाँड गरिनेछ भने प्रदर्शकले आफ्नो आवश्यकताअनुसार कुनै पनि स्टल रोज्न सक्नेछन्। कार्यक्रमको व्यवस्थापन मिडिया स्पेस सोलुसन्स प्रा. लि. द्वारा गरिनेछ।

नाइमा संस्थापक अध्यक्ष रितु सिंह वैद्यका अनुसार, “नेपाल मोबिलिटी एक्स्पो २०२५ ले अटोमोबिल क्षेत्रको भविष्यलाई गति दिनेछ र अन्तर्राष्ट्रिय स्तरको प्रदर्शनीको अनुभव प्रदान गर्ने लक्ष्य राखेको छ।”