काठमाडौं । नेपाल अन्तर्राष्ट्रिय कृष्णभावनामृत संघ (इस्कोन) द्वारा यहि २०७८ असार १३ गते, शुक्रबार राजधानी काठमाडौंमा ४०औँ श्री जगन्नाथ रथयात्रा महामहोत्सव भव्य रूपमा आयोजना गरिने भएको छ। यस ऐतिहासिक अवसरमा सम्माननीय राष्ट्रपति श्री रामचन्द्र पौडेलको प्रमुख आतिथ्य रहने आयोजक संस्थाले जानकारी दिएको छ।

कार्यक्रमको शुभारम्भ बिहान १० बजे नेपाल प्रज्ञा प्रतिष्ठान, कमलादीबाट हुने रथयात्रा घण्टाघर–दरबारमार्ग–पुतलीसडक–प्रदर्शनीमार्ग–भद्रकाली–एनएसी–न्युरोड–बसन्तपुर हुँदै टुडिखेलमा समापन हुने जनाइएको छ। रथयात्रामा श्री जगन्नाथ, बलराम र सुभद्राजीलाई भव्य रथमा विराजमान गराई नगर परिक्रमा गराइनेछ।

राष्ट्रपतिले कार्यक्रम स्थलमा भगवानको दर्शन गरी विशेष पूजामा सहभागी हुनुका साथै इस्कोनका संस्थापक आचार्य श्री श्रीमद् ए.सी. भक्तिवेदान्त स्वामी प्रभुपादलाई माल्यार्पण गर्दै श्रद्धाञ्जली अर्पण गर्नेछन् । साथै, परम्पराअनुसार राष्ट्रपतिद्वारा रथयात्रा मार्गमा सुनौलो झाडुले मार्जन गरी वैष्णव संस्कारलाई निरन्तरता दिइनेछ।

रथयात्रामा हजारौँ भक्तजनहरुले मृदङ्ग, करताल र अन्य बाजाहरुको तालमा हरिनाम संकीर्तन, नाचगान र भजन प्रस्तुत गर्नेछन्। यस अवसरमा विशेष पूजापाठ, आरती, वैदिक मन्त्र उच्चारण, फूल र धूपको सुवासले सम्पूर्ण वातावरण पवित्र बनाइनेछ।

आयोजकका अनुसार रथयात्रा केवल धार्मिक परम्परा मात्र नभई समाजमा प्रेम, करुणा, सेवा र आध्यात्मिक ज्ञान फैलाउने महान अवसर हो। कार्यक्रममा महाप्रसाद वितरण, बालबालिका, युवा र वृद्ध लक्षित आध्यात्मिक प्रवचन, भजन, नृत्य तथा सांस्कृतिक कार्यक्रमहरू पनि आयोजना गरिनेछ।

नेपालमा राजाका प्रमुख आतिथ्यमा परापूर्वकालदेखि मनाइँदै आएको यो श्री जगन्नाथ रथयात्रा परम्परा राष्ट्रपतिको उपस्थितिमा निरन्तरता पाउँदै आएको छ। इस्कोनले यस वर्षको रथयात्रालाई अझ भव्य, सुसंगठित र जनसहभागितायुक्त बनाउनका लागि सम्पूर्ण तयारी पूरा गरेको जनाएको छ।