काठमाडौं  । नेपाल दूरसञ्चार प्राधिकरणले लोकप्रिय म्यासेजिङ एप टेलिग्रामलाई नेपालभरि बन्द गर्ने निर्णय गरेको छ। शुक्रबार सार्वजनिक गरिएको सूचनामार्फत प्राधिकरणले टेलिग्राम एपमार्फत अनलाइन ठगी तथा मनी लाउण्डरिङ्ग (अवैध रूपमा रकम ओसारपसार) जस्ता आपराधिक गतिविधि भएको भन्दै एपको पहुँचमा तत्काल रोक लगाइएको जनाएको छ। प्राधिकरणले देशभरका सबै इन्टरनेट सेवा प्रदायक (ISPs) तथा मोबाइल सेवा प्रदायकलाई टेलिग्राम एप र यससँग सम्बन्धित वेब सेवा बन्द गर्न निर्देशन दिएको छ।

प्राधिकरणको भनाइमा, पछिल्लो समय टेलिग्राम प्रयोग गरेर नकली स्किम, लगानी प्रलोभन, तथा विदेशी मुद्रा कारोबार जस्ता गतिविधिमा संलग्न समूहहरू सक्रिय भएका थिए। यसले सर्वसाधारण नागरिकलाई आर्थिक ठगीमा पार्न थालेपछि कडाइका साथ कारबाही थालिएको प्राधिकरणले जनाएको छ।

यद्यपि, टेलिग्राम विश्वभरि करोडौँले प्रयोग गर्ने एप हो र यसको बन्दले सामान्य प्रयोगकर्तालाई पनि असर गर्न सक्ने भन्दै नागरिक समाज र प्रविधि विज्ञहरूले मिश्रित प्रतिक्रिया जनाइरहेका छन्। दूरसञ्चार प्राधिकरणले भने यदि टेलिग्रामले नेपालका कानुनी मान्यताअनुसार सेवा सञ्चालन गर्ने प्रतिबद्धता जनाएमा फेरी पुनः सक्रिय गर्ने विषयमा विचार गरिन सक्ने जनाएको छ।