काठमाडौं । एनआईसी एशिया बैंक लिमिटेड ले बैंकिङ सम्पत्ति, गैर-बैंकिङ सम्पत्ति तथा धितो सुरक्षणमा रहेका सम्पत्तिहरूको लिलाम बिक्री सम्बन्धी विस्तृत जानकारी उपलब्ध गराउनका लागि अनलाइन पोर्टल सार्वजनिक गरेको छ।

बैंकले जारी गरेको सूचनाअनुसार, अब ग्राहकहरूले लिलाम बिक्रीसम्बन्धी प्रकाशनमा रहेको QR कोड स्क्यान गरी सो पोर्टलमा पुग्न सक्नेछन्। उक्त पोर्टलमार्फत बिक्रीमा रहेका सम्पत्तिहरूको कित्ता नम्बर, क्षेत्रफल, फोटो, नक्सा तथा लोकेशन (Google Map सहित) जस्ता विवरण हेर्न सकिनेछ।

त्यसैगरी, इच्छुक ग्राहकले थप जानकारी लिनका लागि पोर्टलमा उपलब्ध म्यासेज बक्समार्फत आफ्नो नाम, इमेल, मोबाइल नम्बर र सम्पर्क ठेगाना राखी सन्देश पठाउन सक्ने व्यवस्था गरिएको बैंकले जनाएको छ।

बैंकले यस पोर्टलमा नियमित रुपमा सम्पत्ति लिलाम सम्बन्धी सबै जानकारी प्रकाशन गर्ने भएकाले इच्छुक ग्राहकहरूले सो लिंकमार्फत विस्तृत विवरण सहजै प्राप्त गरी लाभ लिन सक्ने विश्वास व्यक्त गरेको छ।