काठमाडौं– नाडा अटो शो २०२५ भृकुटीमण्डपमा आजदेखि सुरु भएको छ, जहाँ डोङफेङको नामी ब्रान्डको नयाँ विद्युतीय एसयूभी नामी ०६ पहिलो पटक सार्वजनिक गरिएको छ। नेपालका लागि नामीका आधिकारिक वितरक एमएडब्लु वृद्धिले यस कारको लन्च गरेको हो।

यसअघि ह्याचब्याक कार नामी ०१ भित्र्याएर ईभी प्रेमीहरूको विश्वास जितेको कम्पनीले एसयूभी सेग्मेन्टमा आफ्नो पहिलो विद्युतीय मोडल पेश गरेको हो। नामी ०६, जसलाई नामी भिगो पनि भनिन्छ, दुई भेरिएन्टमा उपलब्ध छ। नामी ई२ को मूल्य ३७ लाख ९९ हजार र ई२ प्लसको मूल्य ४० लाख ९९ हजार तोकिएको छ। नाडा अटो शोका लागि यो विशेष मूल्य उपलब्ध गरिएको छ।

डोङफेङको क्वान्टम आर्किटेक्चर ३ प्लेटफर्ममा निर्मित यस एसयूभीमा मिनिमल डिजाइन स्टाइलको क्याबिन छ। कारमा १२.८ इन्चको टचस्क्रीन इन्फोटेन्मेन्ट प्रणाली, ८.८ इन्चको इन्स्ट्रुमेन्ट क्लस्टर, प्यानारोमिक सनरुफ, एम्बियन्ट लाइट, ६ स्पीकर, साथै हिटेड, भेन्टिलेटेड र मसाज सिट जस्ता सुविधा उपलब्ध छन्।

सवारी साधनमा ४४.९४ किलोवाट र ५१.८७ किलोवाट आवर ब्याट्री प्याकको विकल्प छ भने मोटर क्षमता ९९ किलोवाट रहेको छ। ब्याट्री ७ किलोवाटको एसी चार्जर र ६० किलोवाटको डीसी फास्ट चार्जरबाट चार्ज गर्न सकिन्छ। डब्लुएलटिपीका अनुसार यस एसयूभीको रेन्ज ३००–३५० किलोमिटर छ।

कम्पनीले आफ्ना प्रतिस्पर्धीलाई ध्यानमा राख्दै मूल्य निर्धारण गरेको छ। नामी ०६ नेपाली बजारमा बीवाईडी एट्टो२, एमजी एस५, हुन्डाई क्रेटा र फरथिङ फ्राइडे एसयूभीसँग प्रतिस्पर्धा गर्नुपर्नेछ।