काठमाडौं । आज एक विशेष समारोहका बीच ओमस्टोन होटेल्स लिमिटेड (दुसित थानी हिमालयन रिसोर्ट) र सिटिजन्स क्यापिटल लिमिटेडबीच साधारण शेयर निष्काशन तथा बिक्री प्रबन्धक नियुक्ति सम्बन्धी सम्झौता सम्पन्न भएको छ।

सम्झौतामा ओमस्टोन होटेल्स लिमिटेडका प्रबन्ध निर्देशक श्री रमेश कुमार हमाल र सिटिजन्स क्यापिटल लिमिटेडका प्रमुख कार्यकारी अधिकृत श्री सबिर बादे श्रेष्ठले हस्ताक्षर गरेका छन्। सम्झौता अनुसार सिटिजन्स क्यापिटलले दोस्रो थानी हिमालयन रिसोर्टको प्राथमिक शेयर सार्वजनिक निष्काशनका लागि बिक्री प्रबन्धकको जिम्मेवारी सम्हाल्नेछ।

समारोहमा संस्थापकको तर्फबाट प्रमुख विदेशी लगानीकर्ता श्री विष्णु मोरको विशेष उपस्थिती रहेको थियो।

दुसित थानी हिमालयन रिसोर्ट सन् २०२३ को चौथो त्रैमासिकदेखि सञ्चालनमा आएको हो। काभ्रेपलाञ्चोकको धुलिखेल, पात्लेखेतमा अवस्थित यस रिसोर्टले हिमालय र काठमाडौं उपत्यकाको मनोरम दृश्यसहितको उत्कृष्ट वातावरणमा अन्तर्राष्ट्रिय स्तरको आतिथ्य सेवा प्रदान गर्दै आएको छ।

दुसित थानी ब्रान्डले हालसम्म विश्वका १८ वटा देशमा सेवा विस्तार गरेको छ भने नेपालमा यसको प्रतिनिधित्व ओमस्टोन होटेल्स लिमिटेडमार्फत भइरहेको छ।

यसैबीच, सिटिजन्स क्यापिटल लिमिटेडले वित्तीय परामर्श, लगानी व्यवस्थापन र म्युचुअल फण्डमा नयाँ आयाम थप्दै पूर्ण वित्तीय सेवा प्रदान गर्दै आएको छ। नेपाल धितोपत्र बोर्डबाट प्रत्यक्ष लगानीकर्तासँग सम्बन्धित काम गर्न स्वीकृत सिटिजन्स क्यापिटलमा सिटिजन्स बैंक, कर्मचारी संचय कोष तथा प्रतिष्ठित उद्योगी व्यवसायीहरुको सह–लगानी रहेको छ।