काठमाडौं। एन आई सी एशिया बैंक लिमिटेडले आफ्नो नाममा रहेका बैंकिङ्ग तथा गैर बैंकिङ्ग सम्पत्तिहरु, साथै धितो सुरक्षणमा रहेका सम्पत्तिहरुको लिलाम बिक्री सम्बन्धी विस्तृत जानकारी उपलब्ध गराउने उद्देश्यले नयाँ अनलाइन पोर्टल सञ्चालनमा ल्याएको छ।

बैंकले सार्वजनिक गरेको पोर्टल https://auctionassistance.nicasiabank.com
मार्फत लिलाम बिक्रीमा रहेका सम्पत्तिहरुको कित्ता नं., क्षेत्रफल, फोटो, नक्सा तथा गुगल म्यापमार्फत स्थान (लोकेशन) सम्बन्धी जानकारी सहज रुपमा प्राप्त गर्न सकिन्छ।

ग्राहकहरूले सो पोर्टलमा रहेको म्यासेज बक्स प्रयोग गरी आफ्नो नाम, इमेल, मोबाइल नम्बर तथा सम्पर्क ठेगाना उल्लेख गरी सम्पत्तिसम्बन्धी थप जानकारी माग गर्न सक्ने व्यवस्था पनि गरिएको बैंकले जनाएको छ।

बैंकका अनुसार यस पोर्टलमा बैंकिङ्ग सम्पत्ति, गैर बैंकिङ्ग सम्पत्ति तथा धितो सुरक्षणमा रहेका सम्पत्तिहरु र लिलाम बिक्रीसम्बन्धी अन्य सूचनाहरू नियमित रूपमा प्रकाशन गरिनेछन्। यसबाट लिलाम सम्पत्तिहरु खरिद गर्न इच्छुक ग्राहकहरूले विस्तृत जानकारी लिएर लाभ लिन सक्ने विश्वास बैंकले व्यक्त गरेको छ।