काठमाडौं। दिगो विकासका लक्ष्यहरू (SDGs) प्राप्त गर्न राष्ट्रिय तथा अन्तर्राष्ट्रिय प्रतिबद्धताहरूलाई आफ्नो सेवा, सुविधा, प्रक्रिया र व्यवसायिक साझेदारीहरू मार्फत टेवा पुर्‍याउने उद्देश्यका साथ कुमारी बैंक लिमिटेडले नयाँ निक्षेप योजना “ग्रीन सेभिङ्ग्स डिपोजिट अकाउन्ट” (Green Savings Deposit Account) सञ्चालनमा ल्याएको छ।

“एक खाता, एक रुख” सिद्धान्तमा आधारित यो योजनाअन्तर्गत खोलिने प्रत्येक खाताको बदलामा एक रुख बैंकका तर्फबाट रोपिनेछ। यसरी, प्रत्येक निक्षेपकर्ताको पर्यावरण संरक्षण र प्रवर्द्धनमा अप्रत्यक्ष सहभागिता रहनेछ। साथै, खातावालहरूले तल उल्लेखित आकर्षक सुविधाहरू पनि प्राप्त गर्नेछन् –

• साधारण बचत खाताको भन्दा ०.२५ प्रतिशत बढी ब्याजदर
• एक लाख रुपैयाँसम्मको बीमा सुविधा
• दुई वर्षसम्म निःशुल्क मोबाइल बैंकिङ सेवा
• दुई लाख रुपैयाँसम्मको फोन लोन सुविधा (योग्यता अनुसार)
• प्रत्येक खाताको बदलामा एक रुख रोप्ने व्यवस्था

यस योजनाबाट संकलित निक्षेप रकमलाई दिगो विकास प्रवर्द्धन गर्ने र वातावरणमैत्री परियोजनाहरूमा कर्जा प्रवाह गर्ने योजना बैंकले जनाएको छ। “हरेक खातासँग जोडिएको रुख रोपणबाट वातावरण संरक्षणमा दोहोरो प्रभाव सृजना हुनेछ,” भन्दै बैंकका दिगो बैंकिङ विभागका प्रमुख अर्पण पौडेलले बताएका छन्।

कुमारी बैंकले यो योजना देशभरका सबै शाखामा उपलब्ध गराएको छ। इच्छुक ग्राहकहरूले बैंकको वेबसाइट वा नजिकको शाखामा सम्पर्क गरी विस्तृत जानकारी प्राप्त गर्न सक्नेछन्। विगत २४ वर्षदेखि निरन्तर बैंकिङ सेवा प्रदान गर्दै आएको कुमारी बैंकले वित्तीय साक्षरता प्रवर्द्धन र दिगो विकासका लक्ष्यहरू हासिल गर्न संस्थागत सामाजिक उत्तरदायित्व (CSR) अन्तर्गत विभिन्न परियोजनामा सक्रिय सहभागिता जनाउँदै आएको छ।

हाल बैंकका ३०२ शाखा, ३१७ एटीएम, ५० एक्सटेन्सन काउन्टर तथा ४८ शाखारहित बैंकिङ एकाइहरू देशभर सञ्चालनमा छन्। कुमारी बैंकले आगामी दिनहरूमा पनि अझ सरल, सुलभ र दिगो बैंकिङ सेवाहरू विस्तार गर्ने प्रतिबद्धता जनाएको छ।