काठमाडौं। सानिमा बैंक लिमिटेडको सञ्चालक समितिको मिति २०८२ साल कार्तिक २४ गते बसेको बैठकको निर्णयानुसार पवन कुमार आचार्यलाई मिति २०८२ माघ १२ गतेदेखि लागू हुने गरी बैंकको प्रमुख कार्यकारी अधिकृत (CEO) पदमा नियुक्त गरिएको छ।

ललितपुर स्थायी बासिन्दा आचार्य २०६० सालमा सानिमा बैंकको स्थापनाकालदेखि नै बैंकमा कार्यरत रहँदै आइरहनु भएको छ। बैंकिङ क्षेत्रमा उहाँले करिब २१ वर्षको अनुभव संगाल्नुभएको छ। हाल उहाँ सानिमा बैंकका नायव प्रमुख कार्यकारी अधिकृतको रूपमा जिम्मेवारी निर्वाह गर्दै आउनुभएको थियो। यसअघि उहाँले बैंकका १० वटा विभागहरूमा विभागीय प्रमुखका रूपमा नेतृत्व प्रदान गर्नुभएको थियो।

उहाँको विशेष दक्षता कर्जा मूल्याङ्कन, डिजिटलाइजेसन र परियोजना लगानी क्षेत्रमा रहेको छ। साथै, उहाँ सानिमा बैंकको सहायक कम्पनी सानिमा क्यापिटल लिमिटेडको सञ्चालक समितिका अध्यक्ष पनि हुनुहुन्छ। बैंकिङ क्षेत्रबाहेक पनि उहाँसँग ४ वर्षको उत्पादन इन्जिनियरिङ अनुभव र ५ वर्षको भिजिटिङ फ्याकल्टीको शैक्षिक अनुभव रहेको छ। शैक्षिक दृष्टिले, आचार्यले अमेरिकाको पिट्सबर्ग स्टेट युनिभर्सिटीबाट स्नातकोत्तर (Master’s) डिग्री तथा इन्जिनियरिङमा स्नातक (Bachelor’s) डिग्री हासिल गर्नुभएको हो। साथै, एस.एल.सी. परीक्षामा उहाँले आदर्श विद्या मन्दिर हाई स्कूलबाट राष्ट्रव्यापी तेस्रो स्थान प्राप्त गर्नुभएको थियो।

सानिमा बैंकले विश्वास व्यक्त गरेको छ कि आचार्यको नेतृत्वमा बैंकले आगामी दिनमा अझ उच्च सफलता र विकासका नयाँ उचाइहरू हासिल गर्नेछ।