काठमाडौं। नेपाल शैक्षिक परामर्श संघ (ECAN) ले शिक्षा, विज्ञान तथा प्रविधिमन्त्रीले शिक्षा परामर्श व्यवसायमा धरौटीसम्बन्धी दिएको अभिव्यक्तिप्रति आपत्ति जनाउँदै त्यस विषयमा संघले कहिल्यै संस्थागत निर्णय वा आधिकारिक धारणा नबनाएको स्पष्ट गरेको छ।

शनिबार जारी विज्ञप्तिमा ECAN ले स्थापना कालदेखि हालसम्म शिक्षा परामर्श व्यवसायमा धरौटीको व्यवस्था हुनुपर्छ भन्ने विषयमा कुनै संस्थागत निर्णय, आधिकारिक धारणा वा नेतृत्व तहबाट प्रस्ताव नगरिएको जनाएको छ। संघले आफ्नो संस्थागत इतिहास र अभिलेखमा समेत यससम्बन्धी कुनै निर्णय नरहेको दाबी गरेको छ।

ECAN ले शिक्षा परामर्श व्यवसायमा धरौटीको व्यवस्था आवश्यक नरहेको आफ्नो संस्थागत अडान विगतदेखि नै कायम रहेको उल्लेख गरेको छ।

विज्ञप्तिमा विगतमा ECAN ले धरौटीसम्बन्धी कुनै प्रस्ताव वा धारणा अघि सारेको भन्ने दाबी गरिएको भए सम्बन्धित व्यक्ति, मिति र प्रमाण सार्वजनिक गर्न सम्बन्धित पक्षसँग आग्रह गरिएको छ। प्रमाणविहीन अभिव्यक्तिलाई तथ्यका रूपमा प्रस्तुत गर्दा शिक्षा परामर्श क्षेत्रमा भ्रम सिर्जना हुन सक्ने भएकाले त्यसप्रति सचेत रहन पनि संघले आग्रह गरेको छ।

ECAN ले शिक्षा परामर्श क्षेत्रमा अनावश्यक विभाजन, भ्रम वा अविश्वास सिर्जना गर्ने अभिव्यक्ति र भाष्यबाट जोगिन सबै सरोकारवालाको साझा दायित्व रहेको उल्लेख गर्दै मन्त्रालय र मन्त्रीले पनि क्षेत्रको एकता, पारस्परिक विश्वास तथा सहकार्यलाई कमजोर पार्ने अवस्था सिर्जना नहुने गरी संवेदनशीलता अपनाउने अपेक्षा व्यक्त गरेको छ।

साथै, शिक्षा परामर्श क्षेत्रको गुणस्तरीय, पारदर्शी र जिम्मेवार विकासका लागि सरकार तथा सबै सरोकारवालासँग रचनात्मक सहकार्य गर्न आफू सदैव प्रतिबद्ध रहेको ECAN ले जनाएको छ।