काठमाडौं । फेदीखोला हाइड्रोपावर कम्पनी लिमिटेडले सर्वसाधारणका लागि १७,६०,००० कित्ता साधारण शेयर (आईपीओ) निष्काशन गर्ने तयारी गरेको छ। यस सम्बन्धी निष्काशन तथा बिक्री कार्यको लागि कम्पनीले एनएमबि क्यापिटल लिमिटेडलाई धितोपत्र निष्काशन तथा बिक्री प्रबन्धकमा नियुक्त गरेको हो।

कम्पनीको अधिकृत तथा जारी पूँजी रु. ८० करोड रहेको छ। यसमध्ये जारी पूँजीको २२ प्रतिशत, अर्थात् रु. १७ करोड ६० लाख बराबरको शेयर (प्रति कित्ता रु. १०० अंकित मूल्यमा) निष्काशन गर्न लागिएको हो।
यो आईपीओ आयोजना प्रभावित क्षेत्रका स्थानीय बासिन्दा, वैदेशिक रोजगारीमा रहेका नेपालीहरू, सामूहिक लगानी कोष, कम्पनीका कर्मचारी तथा सर्वसाधारणका लागि तोकिएको अनुपातमा वितरण गरिनेछ।

आईपीओ निष्काशनका लागि गरिएको सम्झौता पत्रमा फेदीखोला हाइड्रोपावर कम्पनीका तर्फबाट प्रबन्ध सञ्चालक श्री प्रकाशचन्द्र दुलाल र एनएमबि क्यापिटल लिमिटेडका तर्फबाट प्रमुख कार्यकारी अधिकृत श्री दीपेश कुमार वैद्यले हस्ताक्षर गरेका छन्। सम्झौता मिति २०८२ कार्तिक २६ गते सम्पन्न भएको हो।

यो आयोजना भोजपुर जिल्लाको सापाल्पासिलिछो गाउँपालिका–६ मा बहने फेदी (थुमलुङ) खोलामा निर्माणाधीन छ। ४.३ मेगावाट क्षमताको फेदी (थुमलुङ) जलविद्युत आयोजनाको कुल लागत करिब रु. ९४ करोड रहनेछ।
हालसम्म करिब ८५ प्रतिशत निर्माण कार्य सम्पन्न भइसकेको र २०८२ माघभित्र परियोजना सम्पन्न गर्ने लक्ष्य रहेको कम्पनीले जनाएको छ।

प्रबन्ध सञ्चालक दुलालका अनुसार, नियामक निकायका सम्पूर्ण प्रक्रिया पूरा गरी आईपीओ निष्काशनको प्रक्रिया शीघ्र अघि बढाउने योजना सहित निर्माण कार्य तीव्र गतिमा भइरहेको छ।