काठमाडौं । विदेशबाट नेपालमा आउने रेमिट्यान्स सेवालाई अझ सहज, सुरक्षित र विश्वासिलो बनाउने उद्देश्यसहित माछापुच्छ्रे बैंक लिमिटेडले संयुक्त अरब इमिरेट्सस्थित जोयालुक्कास एक्सचेन्जसँग औपचारिक रूपमा रेमिट्यान्स सेवा सम्झौता गरेको छ।

यूएईमा रहेका नेपालीहरूलाई नेपालमा रकम पठाउन सहज बनाउने लक्ष्यसहित दुवै संस्थाबीच सहकार्यमा नयाँ रेमिट्यान्स सेवा सुरु गरिएको बैंकले जनाएको छ। सम्झौतापत्रमा जोयालुक्कास एक्सचेन्जका महाप्रबन्धक मरिश कुमार कर्ण, र माछापुच्छ्रे बैंकका नायब प्रमुख कार्यकारी अधिकृत प्रसिद्ध राज अर्यालले हस्ताक्षर गरेका छन्।

सम्झौता कार्यान्वयनमा आएपछि अब यूएईमा रहेका नेपालीले जोयालुक्कास एक्सचेन्जका ३० भन्दा बढी शाखाबाट रकम पठाउन सक्नेछन्। पठाइएको रकम नेपालमा माछापुच्छ्रे बैंकका १६५ शाखा, शाखारहित बैंकिङ सेवाहरू, ११ एक्सटेन्सन काउन्टर, तथा २० हजारभन्दा बढी रेमिट्यान्स एजेन्टमार्फत भुक्तानी लिन सकिनेछ।

यसबाहेक, जोयालुक्कास एक्सचेन्जमार्फत पठाइएको रेमिट्यान्स नेपालका जुनसुकै बैंकको खातामा तत्काल जम्मा हुने व्यवस्था पनि बैंकले उपलब्ध गराएको छ।

नयाँ तथा प्रविधिमैत्री सेवा विस्तारमा निरन्तर अग्रसर माछापुच्छ्रे बैंकले पूर्वदेखि पश्चिम, हिमाल–पहाड–तराईसम्म २७४ सेवा केन्द्र, तथा १९९ एटीएममार्फत करिब १८ लाखभन्दा बढी ग्राहकलाई अत्याधुनिक बैंकिङ सेवा प्रदान गरिरहेको छ।