काठमाडौं । बन तथा वातावरण मन्त्रालयले मिति २०८२ असार ९ गतेको नेपाल राजपत्रमार्फत नेपाल सवारी प्रदूषण मापदण्ड २०८२ (युरो–६) लागू गरिसकेको अवस्थामा, उक्त मापदण्ड कार्यान्वयन सम्बन्धी केही महत्वपूर्ण प्रावधानबारे नाडा अटोमोबाइल्स एसोसिएशन अफ नेपाल (नाडा) ले जानकारी गराएको छ।

नेपाल सरकार, अर्थ मन्त्रालयले २०८२ असोज १० गते प्रकाशित राजपत्रमार्फत नयाँ मापदण्ड लागू हुनुअघि प्रोफर्मा इनभ्वाइस जारी भइसकेका सवारीसाधन, साथै नेपालमै एसेम्बल वा उत्पादन हुने सवारीसाधन तथा तिनका पार्टपूर्जाका हकमा २०८२ मंसिर १५ गतेसम्म पुरानै मापदण्डअनुसार पैठारी गर्न सकिने व्यवस्था गरेको छ।

नाडाका अनुसार, सोही व्यवस्थाअनुरूप तोकिएको समयसीमाभित्र वाँकी रहेका सवारीसाधनहरू भन्सार जाँचपास गरिदिन सम्बद्ध पक्षलाई अनुरोध गरिएको छ।

यस व्यवस्था कार्यान्वयनका लागि नाडाले बन तथा वातावरण मन्त्रालय र अर्थ मन्त्रालयसँग पत्राचार गरी आवश्यक पहलहरू गर्दै आएको जानकारी पनि संस्थाले सार्वजनिक गरेको छ।