काठमाडौं। माछापुच्छ्रे बैंक लिमिटेडले हरितगृह ग्यास उत्सर्जन मापन, मूल्यांकन तथा न्यूनीकरणका लागि विश्वस्तरमा सक्रिय संस्था ‘पार्टनरशिप फर कार्बन अकाउन्टिङ फाइनान्सियल्स’ (PCAF) मा औपचारिक रूपमा सहभागिता जनाएको छ। यससँगै बैंकले जलवायु परिवर्तनप्रतिको आफ्नो जिम्मेवारीलाई थप सुदृढ बनाएको जनाएको छ।

PCAF वित्तीय क्षेत्रका संस्थाहरूको लगानी तथा ऋण पोर्टफोलियोबाट उत्पन्न हुने कार्बन उत्सर्जन मापनका लागि एकीकृत वैश्विक अभ्यास विकास गर्ने संस्थाका रूपमा परिचित छ। हाल विश्वका ६०० भन्दा बढी वित्तीय संस्था यस सञ्जालसँग आबद्ध छन्।

यस साझेदारीमार्फत बैंकले कार्बन उत्सर्जन मापन र प्रतिवेदनका लागि विश्वव्यापी रूपमा मान्यता प्राप्त मापदण्ड प्रयोग गर्नेछ, जसले भरपर्दो जलवायु रणनीति निर्माणमा सहयोग पुर्‍याउने विश्वास लिइएको छ।

माछापुच्छ्रे बैंकले वातावरणीय प्रभावप्रति बढ्दो चासोलाई ध्यानमा राख्दै आफ्ना वित्तीय गतिविधिबाट हुने उत्सर्जन पहिचान र व्यवस्थापनमा विशेष ध्यान दिने प्रतिबद्धता जनाएको छ। PCAF मा सहभागी भएसँगै वातावरणीय उत्तरदायित्वलाई बैंकको दीर्घकालीन रणनीतिमा समेट्ने कार्यलाई तीव्रता दिइने बैंकले उल्लेख गरेको छ।

बैंकका अनुसार विश्वसनीय कार्बन उत्सर्जन तथ्यांकका आधारमा जलवायु जोखिम विश्लेषण, ऊर्जा–कुशल तथा हरित परियोजनामा लगानी प्रवर्द्धन र वातावरणमैत्री बैंकिङ अभ्यासलाई थप प्रभावकारी बनाइनेछ। साथै, नेपालले लिएको कम–कार्बन उत्सर्जन र जलवायु–लचकदार अर्थतन्त्र निर्माणको यात्रामा पनि यस कदमले सकारात्मक योगदान गर्ने विश्वास बैंकले व्यक्त गरेको छ।