काठमाडौँ । गोरखा ब्रुअरी/कार्ल्सबर्ग समूहले बोतलको पुनःप्रयोग प्रक्रियालाई सहज र प्रभावकारी बनाउने उद्देश्यसहित नयाँ अभियान सुरु गरेको छ। “नेभर लिभ ए बोटल बिहाइन्ड” नारासहित खालिसीसीसँगको सहकार्यमा सुरु गरिएको यस अभियानले देशभरका बार, रेस्टुरेन्ट तथा अन्य व्यवसायिक स्थानलाई समेट्ने जनाएको छ।

अभियानअन्तर्गत खालिसीसीले बार र रेस्टुरेन्टहरूसँग प्रत्यक्ष समन्वय गर्दै प्रयोग भइसकेका शिशाका बोतललाई व्यवस्थित रूपमा संकलन, वर्गीकरण र पुनःप्रयोग प्रक्रियामा पठाउनेछ। यसबाट व्यवसायिक स्थलमै अवशिष्ट व्यवस्थापनको एकीकृत र सहज प्रणाली विकास हुने अपेक्षा गरिएको छ।

गोरखा ब्रुअरीका अनुसार यस मोडेलले व्यवसायिक क्षेत्रको जिम्मेवारी बढाउने, बोतल व्यवस्थापनलाई सरल बनाउने र पुनःप्रयोग गर्न सकिने गिलास ल्यान्डफिलमा पुग्ने अवस्थालाई उल्लेखनीय रूपमा घटाउनेछ।

गोरखा ब्रुअरीले खालिसीसीसँगको सहकार्यले कुनै पनि बोतल बेवास्ता नहुने आफ्नो प्रतिबद्धता व्यवहारमै लागू भएको बताएको छ। व्यवस्थित पुनःप्रयोग समाधानमार्फत कम्पनीले आफ्ना ESG (Environment, Social, Governance) लक्ष्यलाई थप मजबुत बनाउँदै सफा र हरियो नेपाल निर्माणमा योगदान पुर्‍याइरहेको जनाएको छ।