काठमाडौं । नागरिक लगानी कोष ले सञ्चालन गर्दै आएको उपदान तथा पेन्सन योजनामा मेरो माइक्रोफाइनान्स लघुवित्त वित्तीय संस्था आबद्ध भएको छ। यस सम्बन्धी समझदारी पत्र सोमबार कोषका कार्यकारी निर्देशक पर्वत कुमार कार्की र माइक्रोफाइनान्सका प्रमुख कार्यकारी अधिकृत रामहरि दाहाल बीच आदान–प्रदान भएको हो।

६४ जिल्लामा कार्यक्षेत्र फैलिएको उक्त लघुवित्त संस्थामा करिब ५०० कर्मचारी कार्यरत छन्। कोषको यस योजनामा संगठित संस्था तथा तिनका कर्मचारीहरू सहभागी हुन सक्ने व्यवस्था रहेको छ। यसअन्तर्गत योगदानमा आधारित वा गैर–योगदानमा आधारित रूपमा संघ–संस्थाले उपदान कोष व्यवस्थापन गर्न सक्नेछन्। सोही व्यवस्था अनुसार मेरो माइक्रोफाइनान्स उक्त योजनामा आबद्ध भएको हो।

यसअघि पनि कोषसँग विभिन्न लघुवित्त वित्तीय संस्थाहरू आबद्ध भइसकेका छन्। नागरिक लगानी कोष ले २०५५ सालदेखि सञ्चालन गर्दै आएको उपदान तथा पेन्सन योजनामार्फत विभिन्न संस्थामा कार्यरत कर्मचारी तथा कामदारको उपदान र पेन्सनबापतको रकम संकलन गरी लगानी गर्ने तथा सेवाबाट निवृत्त भएपछि भुक्तानी गर्ने व्यवस्था गर्दै आएको छ।

यस योजनामा योगदानमा आधारित र गैर–योगदानमा आधारित दुवै मोडेलमार्फत सहभागी हुन सकिने व्यवस्था रहेको छ।