६२ वर्षदेखि नेपालको अटोमोबाइल क्षेत्रमा सक्रिय प्रतिष्ठित व्यावसायिक घराना वैद्य अर्गनाइजेसन ले अब प्रदर्शनकारी विद्युतीय मोटरसाइकल ब्रान्ड अल्ट्राभायोलेट को नेपालका लागि आधिकारिक आयातकर्ता तथा विक्रेता बनेको छ। यसअघि केडिया समूहले सम्हाल्दै आएको अल्ट्राभायोलेटको जिम्मेवारी अब वैद्य अर्गनाइजेसनले लिएको हो।

यसअघि एथर इनर्जी लाई नेपाली बजारमा सफल रूपमा स्थापित गरिसकेको वैद्य अर्गनाइजेसनले अब अल्ट्राभायोलेटमार्फत अत्याधुनिक प्रविधि, उत्कृष्ट प्रदर्शनी कक्ष, भरपर्दो मर्मत सेवा र बिक्रीपछिको सुविधा उपलब्ध गराउने जनाएको छ। कम्पनीका अनुसार देशभरिका ग्राहकलाई विश्वस्तरीय सेवा दिने लक्ष्यसहित नयाँ रणनीतिमा काम सुरु गरिएको छ।

अन्तरिक्ष प्रविधिबाट प्रेरित डिजाइन, आधुनिक ब्याट्री प्रणाली र स्मार्ट प्रविधिका कारण युरोपमा लोकप्रिय बनेको अल्ट्राभायोलेटले नेपालमा विद्युतीय मोटरसाइकलको नयाँ परिभाषा स्थापित गर्ने विश्वास लिइएको छ। अल्ट्राभायोलेटका प्रमुख कार्यकारी अधिकृत तथा सहसंस्थापक नारायण सुब्रमण्यम ले नेपालको प्रिमियम बजारमा वैद्य अर्गनाइजेसनको बलियो उपस्थिति रहेको भन्दै सहकार्यप्रति खुसी व्यक्त गर्नुभएको छ। उहाँले कम्पनीको प्रमुख मोडल ‘एफ–७७’ नेपाली युवामाझ लोकप्रिय हुने विश्वास व्यक्त गर्नुभयो।

त्यसैगरी वैद्य अर्गनाइजेसनका प्रमुख कार्यकारी अधिकृत सूर्यांश वैद्य ले नेपाली अटोमोबाइल बजार तीव्र रूपमा आधुनिकतातर्फ अघि बढिरहेको उल्लेख गर्दै ग्राहकले अब केवल सवारीसाधन मात्र नभई अत्याधुनिक प्रविधि, आकर्षक डिजाइन र उच्च प्रदर्शन खोज्न थालेको बताउनुभयो। उहाँका अनुसार अल्ट्राभायोलेटको आगमनले नेपालको विद्युतीय सवारी बजारलाई नयाँ उचाइमा पुर्‍याउनेछ।

अत्यन्त शक्तिशाली मानिएको एफ–७७ मोटरसाइकलमा १० दशमलव ३ किलोवाट आवर क्षमताको ब्याट्री जडान गरिएको छ। यसले ३० किलोवाट अर्थात् ४० दशमलव २ अश्वशक्ति बराबरको शक्ति र १०० न्युटन मिटर टर्क उत्पादन गर्छ। यो मोटरसाइकलले केवल २ दशमलव ८ सेकेन्डमै शून्यदेखि ६० किलोमिटर प्रतिघण्टाको गति समात्न सक्छ भने यसको उच्चतम गति १५५ किलोमिटर प्रतिघण्टा रहेको छ। एकपटक पूरा चार्ज गर्दा ३२३ किलोमिटरसम्म चल्ने दाबी गरिएको छ।

सुरक्षाका लागि यसमा तीन तहको ट्र्याक्सन नियन्त्रण प्रणाली, १० तहको पुनःऊर्जा ब्रेकिङ प्रणाली, एबीएससँग जोडिएको गतिशील स्थिरता नियन्त्रण तथा उकालोमा सवारी रोकिँदा सहयोग गर्ने सुविधा जडान गरिएको कम्पनीले जनाएको छ।

हाल उपलब्ध मोडलसँगै वैद्य अर्गनाइजेसनले निकट भविष्यमै संसारकै पहिलो एकीकृत राडार प्रविधियुक्त मोटरसाइकल ‘एक्स–४७ क्रसओभर’ समेत नेपाल ल्याउने तयारी गरेको छ। नेपाली बजारमा एफ–७७ को आधारभूत मोडलको मूल्य ८ लाख ११ हजार रुपैयाँ र ‘रिकन’ मोडलको मूल्य ९ लाख ६९ हजार रुपैयाँ निर्धारण गरिएको छ। कम्पनीले बुकिङ खुला भइसकेको जनाएको छ।

सन् २०१६ मा नारायण सुब्रमण्यम र नीरज राजमोहन द्वारा स्थापना गरिएको अल्ट्राभायोलेटलाई टिभीएस मोटर कम्पनी र जोहो कर्पोरेसनजस्ता अन्तर्राष्ट्रिय लगानीकर्ताको साथ रहेको छ। युरोपेली प्रमाणीकरण प्राप्त गर्ने पहिलो भारतीय विद्युतीय मोटरसाइकल ब्रान्डका रूपमा समेत अल्ट्राभायोलेट परिचित छ।