काठमाडौं । सांग्रिला डेभलपमेन्ट बैंक लिमिटेडले आफ्नो २१औँ वार्षिक साधारण सभा सोमबार काठमाडौंमा सम्पन्न गरेको छ।

सभाले बैंकको हाल कायम चुक्ता पूँजी ३ अर्ब ५५ करोड ६२ लाख ५५ हजार ७१९ रुपैयाँ ५५ पैसाको आधारमा ५.३५८३ प्रतिशत नगद लाभांश (कर सहित) तथा ५ प्रतिशत बोनस शेयर वितरण गर्ने प्रस्ताव पारित गरेको हो। यसअनुसार बैंकले सेयरधनीलाई कुल १०.३५८३ प्रतिशत लाभांश वितरण गर्नेछ।

नगद लाभांशतर्फ बैंकले १९ करोड ५ लाख ५३ हजार ६२६ रुपैयाँ ३० पैसा र बोनस शेयरतर्फ १७ करोड ७८ लाख १२ हजार ७८५ रुपैयाँ ९८ पैसा बराबरको लाभांश वितरण गर्ने निर्णय गरेको छ। लाभांश वितरणपछि बैंकको चुक्ता पूँजी बढेर ३ अर्ब ७३ करोड ४० लाख ६८ हजार ५०५ रुपैयाँ ५३ पैसा पुगेको छ।

साधारण सभाले आर्थिक वर्ष २०८१/८२ का वित्तीय विवरण र लेखापरीक्षकको प्रतिवेदन पारित गर्नुका साथै चालु आर्थिक वर्षका लागि लेखापरीक्षक नियुक्ति, प्रवन्धपत्र संशोधन तथा मर्जर र प्राप्तिसम्बन्धी प्रस्तावहरू पनि स्वीकृत गरेको छ।

हाल सांग्रिला डेभलपमेन्ट बैंकले देशभर १०९ शाखा कार्यालय र ३० वटा एटीएम मार्फत बैंकिङ सेवा प्रदान गर्दै आएको छ। बैंकले आगामी दिनमा संस्थागत सुशासन, जोखिम व्यवस्थापन तथा आन्तरिक नियन्त्रण प्रणालीलाई थप सुदृढ गर्दै सेवा विस्तारलाई निरन्तरता दिने जनाएको छ।