काठमाडौं, नेपाल। नेपाल प्रिमियम लिग (NPL) सिजन २ को ऐतिहासिक समापनसँगै नेपालका लागि ओमोडा र जेको (Omoda & Jaecoo) गाडीहरूको आधिकारिक बिक्रेता एसपीजी अटोमोबाइल्स प्रा. लि. ले राष्ट्रिय क्रिकेट टोलीका कप्तान रोहित पौडेलका लागि महत्वपूर्ण सहयोगको घोषणा गरेको छ।

एनपीएल सिजन २ मा “इलेक्ट्रिफाइङ प्लेयर अफ द टूर्नामेन्ट” घोषित रोहित पौडेललाई पुरस्कारस्वरूप प्रदान गरिएको जेको (Jaecoo) J5 इलेक्ट्रिक SUV मा लाग्ने २५ प्रतिशत उपहार कर (Gift Tax) कम्पनीले पूर्ण रूपमा आफैंले बेहोर्ने निर्णय गरेको हो। उक्त घोषणा गाडीको भव्य हस्तान्तरण कार्यक्रमका क्रममा आधिकारिक रूपमा गरिएको थियो।

जेको J5 एक प्रिमियम इलेक्ट्रिक SUV हो, जसलाई विलासिता र मजबुत प्रदर्शन दुवैलाई ध्यानमा राखेर डिजाइन गरिएको छ। यसमा ४६१ किलोमिटरको ड्राइभिङ रेन्ज, १५५ किलोवाट क्षमताको शक्तिशाली मोटर तथा १८५ एमएमको ग्राउन्ड क्लियरेन्स रहेको छ। कम्पनीका अनुसार यो गाडी नेपालको विविध भू–बनोटमा सहज यात्राका लागि उपयुक्त छ।

एसपीजी अटोमोबाइल्स प्रा. लि. नेपालका लागि ओमोडा, जेको र इकाउर (iCAUR) ब्रान्डहरूको आधिकारिक बिक्रेता हो। कम्पनीले दिगो तथा विद्युतीय सवारीसाधनमार्फत नेपालको हरित ऊर्जा रूपान्तरणमा योगदान पुर्‍याउँदै आएको छ भने राष्ट्रिय खेलकुद क्षेत्रको विकासमा पनि सक्रिय रूपमा सहयोग गर्दै आएको जनाएको छ।