काठमाडौं । नोबेल कलेज अफ हेल्थ एण्ड एजुकेशन फाउण्डेशन लिमिटेडले निकट भविष्यमा सर्वसाधारणका लागि प्राथमिक शेयर (आईपीओ) निष्काशन गर्ने भएको छ। कम्पनीले विद्यमान धितोपत्र दर्ता तथा निष्काशनसम्बन्धी नियमावली र धितोपत्र निष्काशन तथा बाँडफाँडसम्बन्धी निर्देशिकामा भएको व्यवस्था बमोजिम नियमनकारी निकायबाट आवश्यक स्वीकृति प्राप्त गरी आईपीओ निष्काशन गर्न लागेको हो।

आईपीओ निष्काशन तथा बिक्री व्यवस्थापनको जिम्मेवारी नबिल इन्भेष्टमेण्ट बैंकिङ लिमिटेडलाई प्रदान गरिएको छ। यससम्बन्धी सम्झौतापत्रमा नोबेल कलेज अफ हेल्थ एण्ड एजुकेशन फाउण्डेशन लिमिटेडका अध्यक्ष श्री नवराज पाण्डे र नबिल इन्भेष्टमेण्ट बैंकिङ लिमिटेडका प्रमुख कार्यकारी अधिकृत श्री मनिष नारायण जोशीले हस्ताक्षर गर्नुभएको छ।

३ अर्ब ५० करोड रुपैयाँ जारी पूँजी रहेको कम्पनीले आफ्नो जारी पूँजीको करिब २८.५७ प्रतिशत शेयर सर्वसाधारणका लागि प्राथमिक निष्काशन गर्ने जनाएको छ। बाँकी करिब ७१.४३ प्रतिशत शेयर संस्थापक समूहको स्वामित्वमा रहनेछ।

‘फ्रन्टलाइन’ ब्राण्ड नामबाट काठमाडौंको पुरानो बानेश्वरमा सञ्चालनमा रहेको यस अस्पतालको हाल १०० शैयाको क्षमता रहेको छ। अस्पतालले विश्वस्तरीय चिकित्सा सेवा प्रदान गर्दै आएको दाबी गरेको छ। थप सेवा विस्तारका लागि निर्माणाधीन २०० शैयाको जनरल तथा क्यान्सर अस्पताल सञ्चालन गर्नुपर्ने भएकाले थप पूँजी आवश्यक परेको र सोही उद्देश्यले आईपीओ निष्काशन गर्न लागिएको कम्पनीका अध्यक्ष नवराज पाण्डेले जानकारी दिनुभयो।

अस्पतालले हाल स्नातक तहका विद्यार्थीलाई लक्षित गरी नर्सिङ, फार्मेसीलगायतका शैक्षिक कार्यक्रमसमेत सञ्चालन गर्दै आएको छ। चिकित्सा सेवा तथा शैक्षिक कार्यक्रम प्रदान गर्दै आएको नोबेल कलेज अफ हेल्थ एण्ड एजुकेशन फाउण्डेशन लिमिटेडको स्थापना वि.सं. २०६२ साल मंसिर १९ गते भएको हो।

कम्पनीका अनुसार हाल संस्थाको वार्षिक कारोबार ५० करोड रुपैयाँभन्दा बढी रहेको छ भने २०० भन्दा बढी कर्मचारी कार्यरत छन्।