काठमाडौं। सूर्य नेपाल गल्फ टुर २०२५–२६ अन्तर्गतको पहिलो प्रतियोगिता सूर्य नेपाल सेन्ट्रल ओपन मा डिफेन्डिङ च्याम्पियन एमेच्योर खेलाडी राहुल विश्वकर्मा ले लगातार तेस्रो दिन पनि अग्रता कायमै राखेका छन्।

तेस्रो दिनको खेलपछि राहुलले निकटतम प्रतिस्पर्धी प्रोफेसनल गल्फर जयराम श्रेष्ठ भन्दा ५ स्ट्रोकको अग्रता बनाएका छन्। राहुलले आज १–ओभर ७३ को कार्ड खेल्दै समग्रमा १०–अन्डर २०६ स्कोर बनाएका छन्।

जयरामले आज उत्कृष्ट प्रदर्शन गर्दै ४–अन्डर ६८ को स्कोर निकाले। यससँगै उनी समग्रमा ५–अन्डर २११ स्कोरसहित दोस्रो स्थानमा उक्लिएका छन्। भुवन कुमार रोक्काले आज ४–ओभर ७६ खेल्दै समग्रमा इभन–पार २१६ स्कोरसहित तेस्रो स्थानमा झरे।

समग्रमा २–ओभर २१८ स्कोरसहित तोरण विक्रम शाही, शुक्र बहादुर राई र दिनेश प्रजापति संयुक्त रूपमा चौथो स्थानमा छन्। तोरणले दिनकै उत्कृष्ट ६–अन्डर ६६ को कार्ड बनाउँदै १० स्थान सुधार गरे। शुक्र र दिनेशले इभन–पार ७२ मा तेस्रो दिनको खेल समाप्त गरे।

नेपालका नम्बर एक प्रो खेलाडी निरज तामाङ, भुवन नगरकोटी र एमेच्योर खेलाडी रुबेन थापा समग्रमा ६–ओभर २२२ स्कोरसहित संयुक्त सातौं स्थानमा छन्। निरज र रुबेनले ४–ओभर ७६ तथा भुवनले ५–ओभर ७७ को स्कोर बनाए।

यसैगरी प्रदीप कुमार लामा र एमेच्योर साम डोबलार्ड समग्रमा ७–ओभर २२३ स्कोरसहित संयुक्त दशौं स्थानमा रहेका छन्। प्रदीपले २–ओभर ७४ र सामले १–ओभर ७३ को कार्ड खेले।

तेस्रो दिन राहुलले फ्रन्ट नाइन इभन–पार ३६ मा पूरा गरे। उनले पहिलो, पाँचौं र सातौं होलमा बर्डी गरे भने छैटौं होलमा बोगी र आठौं होलमा डबल बोगी खेप्न पुगे। ब्याक नाइनमा १४औं होलको बोगीसँगै १–ओभर ३७ मा खेल समाप्त गरे।

जयरामले दोस्रो होलको बोगीपछि पहिलो, चौथो र सातौं होलमा बर्डी गर्दै फ्रन्ट नाइन २–अन्डर ३४ मा सके। ब्याक नाइनमा १२औं, १३औं र १७औं होलमा बर्डी गरे भने १४औं होलको बोगीसँगै ब्याक नाइन पनि २–अन्डर ३४ मा समाप्त गरे।

भुवनले पाँचौं होलमा बर्डी गरे पनि छैटौं र आठौं होलको बोगीका कारण फ्रन्ट नाइन १–ओभर ३७ खेले। ब्याक नाइनमा १२औं होलमा इगल गरे पनि १४औं होलमा डबल बोगी र १३औं, १६औं तथा १८औं होलमा बोगी खेप्दै ३–ओभर ३९ मा खेल सके।

प्रतियोगिताको कुल पुरस्कार राशि १० लाख ५० हजार रुपैयाँ रहेको छ। उपाधि विजेताले १ लाख ७० हजार, उपविजेताले १ लाख २५ हजार, तेस्रो हुनेले १ लाख, चौथोले ८२ हजार र पाँचौं हुनेले ७२ हजार रुपैयाँ नगद पुरस्कार प्राप्त गर्नेछन्। कट बनाउने शीर्ष १८ खेलाडीले नगद पुरस्कार हात पार्नेछन्।