काठमाडौं । नेपाल बैंक लिमिटेड र नेशनल प्याथ ल्याब रिसर्च सेन्टर प्रा. लि. बीच बैंकका कर्मचारी तथा खातावाल ग्राहकहरूलाई स्वास्थ्य सेवामा विशेष छुट प्रदान गर्ने सम्झौतामा हस्ताक्षर भएको छ।

सम्झौता अनुसार नेपाल बैंक लिमिटेडमा कार्यरत कर्मचारीहरू तथा बैंकमा खाता रहेका ग्राहकहरूले नेशनल प्याथ ल्याब रिसर्च सेन्टर प्रा. लि. का विभिन्न शाखामा उपलब्ध प्याथोलोजी ल्याब सेवा तथा विविध हेल्थ प्याकेजहरूमा १० प्रतिशतदेखि ५० प्रतिशतभन्दा बढी छुट प्राप्त गर्न सक्नेछन्। शर्तअनुसार केही सेवामा निःशुल्क होम डेलिभरी सुविधा समेत उपलब्ध हुनेछ।

सम्झौतापत्रमा मिति २०८२ साल पौष १४ गते नेपाल बैंक लिमिटेडको तर्फबाट बजारीकरण तथा अनुसन्धान डिभिजनका प्रमुख निर्मल सुवेदी र नेशनल प्याथ ल्याब रिसर्च सेन्टर प्रा. लि. को तर्फबाट प्रबन्ध निर्देशक पवन जोशीले हस्ताक्षर गर्नुभएको हो।

यस सम्झौताबाट नेपाल बैंक लिमिटेडका कर्मचारी तथा खातावाल ग्राहकहरूले नेशनल प्याथ ल्याब रिसर्च सेन्टर प्रा. लि. का नक्साल, महाराजगञ्ज, ललितपुर, रुपन्देही, भैरहवा, पोखरा, चितवन, तुल्सीपुर, घोराही, धनगढी, गुल्मी, अर्घाखाँची र महेन्द्रनगरस्थित शाखाहरूबाट प्रदान गरिने उच्चस्तरीय स्वास्थ्य तथा परीक्षण सेवाबाट लाभ लिन सक्नेछन्।