सर्लाही। सिद्धार्थ बैंक लिमिटेडले सर्लाहीको हरिवन नगरपालिका–स्थित हरिवन नगर अस्पताललाई विभिन्न अत्याधुनिक प्रसूति तथा शल्यक्रिया उपकरण हस्तान्तरण गरेको छ। बैंकका मधेश प्रदेश प्रमुख ज्ञानेन्द्र कार्कीले पौष १७ गते आयोजित कार्यक्रममा उपकरणहरु अस्पताललाई औपचारिक रूपमा बुझाएका हुन्।

उक्त कार्यक्रममा मधेश प्रदेशका स्वास्थ्य तथा जनसंख्या मन्त्री जंगीलाल राय, हरिवन नगरप्रमुख रमेश बुढाथोकीसहित स्थानीय सरोकारवालाको उपस्थिति रहेको थियो।

बैंकले अस्पताललाई १/१ थानका दरले हाईड्रोलिक शल्यक्रिया टेबल, चार सेट एलइडी शल्यकक्ष डोम बत्ति, बिरामी निगरानी यन्त्र, पाँच कार्य सञ्चालन गर्न मिल्ने पूर्ण सुविधासहितको इलेक्ट्रिक आईसीयू बेड, फाइबर बेडसाइड लकर तथा इलेक्ट्रिक डबल जार हाई भ्याकुम सक्सन मेसिन प्रदान गरेको जनाएको छ।

अस्पतालको नवनिर्मित भवनमा शल्यक्रियासहितको वर्थिङ सेवा सञ्चालन गर्ने उदेश्यअनुसार उपकरण हस्तान्तरण गरिएको बैंकले जनाएको छ। यसबाट समुदायका आमाहरू र नवजात शिशुहरूका लागि सुरक्षित तथा गुणस्तरीय प्रसूति सेवामा पहुँच बढ्ने विश्वास लिइएको छ।

सिद्धार्थ बैंकले दिगो विकास लक्ष्यलाई प्राथमिकतामा राख्दै निरन्तर सामाजिक जिम्मेवारी अन्तर्गतका कार्य गर्दै आएको बताइएको छ। बैंकले आगामी दिनमा पनि यस्ता गतिविधि निरन्तरता दिने योजना रहेको जानकारी गराएको छ।