काठमाडौँ । प्रभु बैंक लिमिटेडको २४औं वार्षिक साधारण सभा बुधबार बबरमहलस्थित प्रधान कार्यालयमा सम्पन्न भएको छ। बिहान ११ बजे सुरु भएको सभाले विभिन्न एजेण्डाहरू सर्वसम्मत रूपमा पारित गरेको बैंकले जनाएको छ।

बैंकका सञ्चालक समिति अध्यक्ष किशोरजङ्ग कार्कीको अध्यक्षतामा बसेको सभाले सञ्चालक समितिको प्रतिवेदनसँगै आर्थिक वर्ष ०८१/०८२ को वासलात, नाफा-नोक्सान, नगद प्रवाह विवरण तथा अन्य अनुसूचीहरू स्वीकृत गरेको छ।

सो वार्षिक साधारण सभाले बैंकका सहायक कम्पनीहरू प्रभु क्यापिटल लिमिटेड र प्रभु स्टक मार्केट लिमिटेड को एकीकृत वित्तीय विवरण पनि पारित गरेको छ।

प्रभु बैंकले अहिले देशभर ३१२ शाखा, ६८ एक्स्टेन्सन काउण्टर र २६९ एटिएममार्फत ३७ लाखभन्दा बढी ग्राहकलाई सेवा दिइरहेको छ।
बैंकले साधारण सभामा सहभागिता जनाएका शेयरधनी, सञ्चारकर्मी तथा सरोकारवालाप्रति धन्यवाद व्यक्त गरेको छ।