विराटनगर। निक्षेप तथा कर्जा सुरक्षण कोषले कर्जा सम्बन्धी नयाँ सफ्टवेयरको अभिमुखीकरण तथा पृष्ठपोषण लिने उद्देश्यले विराटनगरमा एक दिने कार्यशाला गोष्ठी सम्पन्न गरेको छ।

कोषको केन्द्रीय कार्यालय र विराटनगर शाखा कार्यालयको संयुक्त आयोजनामा विराटनगरस्थित होटेल रत्नामा आयोजित उक्त गोष्ठीमा विभिन्न बैंक तथा वित्तीय संस्थाका प्रतिनिधिहरूको सहभागिता रहेको थियो। कार्यक्रममा एक्सेल डेभलपमेन्ट बैंक, सप्तकोशी डेभलपमेन्ट बैंक, सपोर्ट, फरवार्ड, जीवन विकास, छिमेक, ग्लोबल आइएमई, स्वरोजगार, मेरो माइक्रोफाइनान्स, एनआइसी एशिया, सुर्योदय वोमी लघुवित्त वित्तीय संस्था लगायत सदस्य संस्थाका प्रतिनिधिहरू सहभागी भएका थिए।

कार्यक्रमको सुरुवातमा कोषका कर्जा विभाग प्रमुख प्रबन्धक विक्रान्त आचार्यले कोषमा सञ्चालनमा रहेका तथा सञ्चालनमा आउन लागेका कर्जा सम्बन्धी कार्यक्रमहरूको जानकारी दिनुभएको थियो। सदस्य संस्थाका प्रतिनिधिहरूबाट उठेका जिज्ञासाहरूको जवाफ दिँदै कोषका प्रमुख कार्यकारी अधिकृत रमेश घिमिरेले कोषका भावी योजना तथा कार्यक्रमबारे जानकारी गराउनुभएको थियो।

त्यसैगरी कर्जा विभागका प्रधान सहायक पुष्पा भट्टले कर्जा सम्बन्धी नयाँ सफ्टवेयरको प्रस्तुतीकरण गर्नुभएको थियो। उक्त सफ्टवेयर सम्बन्धी सहभागी संस्थाहरूबाट प्राप्त सुझाव तथा सल्लाहहरू कर्जा विभागका सहायक अधिकृत आशिष पौडेलले संकलन गरेका थिए। प्राप्त सुझावहरूलाई सफ्टवेयरमा समावेश गरी कर्जा सम्बन्धी दाबी तथा क्षतिपूर्ति प्रक्रियालाई सहज बनाउने लक्ष्य रहेको कोषले जनाएको छ।

गोष्ठीमा करिब ७५ जना प्रतिनिधिहरूको सहभागिता रहेको थियो।

कोषले वार्षिक नीति तथा कार्यक्रमअनुसार बैंक तथा वित्तीय संस्थासँग निरन्तर संवाद र छलफल गर्दै बजार सुरक्षणको आवश्यकता अनुसार मौजुदा कार्यक्रमहरूमा रहेका समस्या पहिचान गर्ने तथा सुझाव संकलन गर्ने उद्देश्यले चालु आर्थिक वर्षमा सबै प्रदेश समेट्ने गरी यस्ता गोष्ठी सञ्चालन गर्ने जनाएको छ।