काठमाडौँ । नबिल बैंक लिमिटेडको मुनाफामा चालू आर्थिक वर्ष २०८२/८३ को दोस्रो त्रैमाससम्म उच्च सुधार देखिएको छ। बैंकले सार्वजनिक गरेको वित्तीय विवरणअनुसार अधिकांश वित्तीय सूचकमा लोभलाग्दो वृद्धि भएको छ।

चालू आर्थिक वर्षको ६ महिनाको अवधिमा बैंकको खुद नाफा ४ अर्ब ७५ करोड ९६ लाख रुपैयाँ पुगेको छ, जुन गत वर्षको सोही अवधिको ३ अर्ब २४ करोड ४२ लाख रुपैयाँको तुलनामा ४६.७१ प्रतिशतले बढी हो।

पुष मसान्तसम्मको अवधिमा बैंकको खुद ब्याज आम्दानी २.४२ प्रतिशतले बढेर ८ अर्ब ८ करोड ७२ लाख रुपैयाँ पुगेको छ। गत वर्षको सोही अवधिमा यो आम्दानी ७ अर्ब ८९ करोड रुपैयाँ रहेको थियो।

बैंकको सञ्चालन मुनाफा पनि २६.९५ प्रतिशतले बढेको छ। गत वर्षको सोही अवधिमा ५ अर्ब १७ करोड ७४ लाख रुपैयाँ रहेको सञ्चालन मुनाफा चालू वर्षमा बढेर ६ अर्ब ५७ करोड २६ लाख रुपैयाँ पुगेको छ।

समीक्षा अवधिमा बैंकको वितरणयोग्य मुनाफा ७३ प्रतिशतले बढेर ३ अर्ब २७ करोड ३० लाख, खुद फी तथा कमिशन आम्दानी ६.६१ प्रतिशतले बढेर १ अर्ब ६१ करोड, चुक्ता पूँजी १८.४८ प्रतिशतले बढेर ३२ अर्ब ५ करोड ६९ लाख, र जगेडा कोषमा ३६ अर्ब ७० करोड रुपैयाँ सञ्चित रहेको छ।

बैंकको खराब कर्जा (NPL) ४.९३ प्रतिशतबाट घटेर ४.२५ प्रतिशत पुगेको छ। प्रतिशेयर आम्दानी ३५.०४ रुपैयाँ र प्रतिशेयर नेटवर्थ २३५.६४ रुपैयाँ कायम रहेको छ।