काठमाडौं। एनआईसी एशिया बैंक लिमिटेडले चालू आर्थिक वर्षको पहिलो ६ महिनामा खुद नाफा १३ करोड ११ लाख रुपैयाँ कमाएको छ। यो गत आवको सोही अवधिको १५ करोड १७ लाख रुपैयाँ खुद नाफाको तुलनामा १३.५४ प्रतिशतले कम हो।

बैंकको वित्तीय विवरणअनुसार, खुद ब्याज आम्दानी गत आवको पुस मसान्तसम्म ५ अर्ब १६ करोड ६९ लाख रुपैयाँ रहेकोमा चालू आवको पुस मसान्तसम्म १५.५४ प्रतिशत घटेर ४ अर्ब ३६ करोड ३८ लाख रुपैयाँमा झरेको छ।

त्यसैगरी, कुल सञ्चालन आम्दानी ६ अर्ब ५ करोड ३९ लाख रुपैयाँबाट घटेर ५ अर्ब ३३ करोड ९१ लाख रुपैयाँमा सीमित भएको छ। यसरी आम्दानी घट्दा बैंकको सञ्चालन नाफा पनि ३४ करोड १९ लाख रुपैयाँबाट घटेर १९ करोड ७७ लाख रुपैयाँमा झरेको छ।

समीक्षा अवधिमा प्रतिशेयर आम्दानी (EPS) २.०४ रुपैयाँबाट घटेर १.७७ रुपैयाँमा सीमित भएको छ भने खराब कर्जा (NPL) ४.६१ प्रतिशतबाट बढेर ७.४७ प्रतिशत पुगेको छ। प्रतिशेयर नेटवर्थ १९८.३३ रुपैयाँ रहेको छ भने मूल्य आम्दानी अनुपात (P/E Ratio) १८८.४४ रहेको छ।

बैंकको चुक्ता पूँजी १४ अर्ब ९१ करोड ७५ लाख रुपैयाँ रहेको छ। जगेडा कोषमा ७ अर्ब ३९ करोड ९५ लाख रुपैयाँ ऋणात्मक रहेको भए तापनि रिजर्भ फण्डमा २२ अर्ब ६ करोड ८१ लाख रुपैयाँ सञ्चित छ। बैंकले २ खर्ब ९ अर्ब ३१ करोड १२ लाख रुपैयाँ कर्जा प्रवाह गरी ३ खर्ब २७ अर्ब ५० करोड १४ लाख रुपैयाँ निक्षेप संकलन गरेको छ।