काठमाडौँ । नेशनल लाईफ इन्स्योरेन्स कम्पनी लिमिटेडले आफ्नो मासिक योजना “मन्थन २०८२” अन्तर्गत छनौट भएका अभिकर्ताहरूलाई एकदिने तालिम प्रदान गरेको छ।

कम्पनीले बागमती र मधेश प्रदेशका विभिन्न शाखा कार्यालयमा आबद्ध रही व्यवसायमा तोकिएको लक्ष्य पूरा गर्न सफल अभिकर्ताहरूलाई लक्षित गर्दै धुलिखेलस्थित होटल सारथीमा तालिम कार्यक्रम आयोजना गरेको हो।

कम्पनीका उप प्रमुख कार्यकारी अधिकृत स्मृती राज कडेलको सभापतित्वमा सम्पन्न उक्त कार्यक्रममा छनौट भएका २८० जना अभिकर्ताहरूलाई चर्चित प्रशिक्षक काजिम राजाले प्रशिक्षण प्रदान गरेका थिए। प्रशिक्षणका क्रममा उनले विभिन्न उदाहरण प्रस्तुत गर्दै एमडिआरटी (MDRT) लक्ष्य हासिल गर्ने उपायहरूबारे जानकारी दिएका थिए।

कार्यक्रममा उप प्रमुख कार्यकारी अधिकृत कडेलले अभिकर्ता पेशालाई थप व्यावसायिक बनाउने उद्देश्यले कम्पनीले विभिन्न अभिकर्ता–मैत्री मासिक तथा वार्षिक योजना सञ्चालन गर्दै आएको बताए। उनले “प्रेरणा, प्रगति र पेशागत उत्कृष्टता” नारासहित मन्थन योजना अघि बढाइएको उल्लेख गर्दै, देशभरबाट ७०० भन्दा बढी अभिकर्ता छनौट हुनु यस योजनाको सफलताको प्रमाण भएको बताए।

सो अवसरमा शाखास्तरीय प्रथम, द्वितीय तथा तृतीय स्थान हासिल गर्ने अभिकर्ताहरूलाई मायाको चिनो प्रदान गरिएको थियो।

कार्यक्रममा एजेन्सी विभाग प्रमुख सुशिल प्रताप राणाले यस्ता तालिमले अभिकर्ताहरूलाई आफ्नो पेशामा उत्कृष्टता हासिल गर्न र प्रतिस्पर्धात्मक बजारमा आफूलाई अब्बल साबित गर्न मद्दत गर्ने बताए।

तालिममा सहभागी अभिकर्ताहरूले यस्ता कार्यक्रमबाट बिमा व्यवसायमा अझ प्रगति गर्ने प्रेरणा मिलेको बताएका थिए भने सम्मानित अभिकर्ताहरूले आफ्नो मेहनतको फल प्राप्त भएको भन्दै आगामी दिनमा अझ मेहनतका साथ पेशालाई अगाडि बढाउने प्रतिबद्धता व्यक्त गरेका थिए।