सुर्खेत, माघ २४ — अर्थमन्त्री रामेश्वरप्रसाद खनालले आगामी २०८२ फागुन २१ गते हुने प्रतिनिधि सभा निर्वाचनको तयारीको अवस्थाबारे सुर्खेत जिल्लामा स्थलगत अनुगमन गरेका छन्।

निर्वाचन तयारी अनुगमन कार्यक्रम अन्तर्गत शनिबार सुर्खेत पुगेका अर्थमन्त्री खनालले प्रमुख जिल्ला अधिकारीसहित जिल्लास्थित चारवटै सुरक्षा निकायका प्रमुखसँग छलफल गर्दै निर्वाचन तयारी, सुरक्षा व्यवस्थापन तथा आचारसंहिता पालनाको अवस्थाबारे जानकारी लिएका थिए।

सो अवसरमा सुर्खेतका प्रमुख जिल्ला अधिकारी जगदीश्वर उपाध्यायले निर्वाचन आचारसंहिता पालनाको अवस्था सन्तोषजनक रहेको जानकारी दिएका थिए। साथै जिल्लामा २० वटा मतदान केन्द्रलाई अति संवेदनशील मतदान केन्द्रका रूपमा वर्गीकरण गरिएको समेत उनले बताएका थिए।

अर्थमन्त्री खनालले प्रदेश निर्वाचन कार्यालयमा पनि स्थलगत भ्रमण गर्दै निर्वाचन तयारीबारे जानकारी लिएका थिए। सो क्रममा मुख्य निर्वाचन अधिकृत तथा निर्वाचन क्षेत्र नम्बर २ का निर्वाचन अधिकृत दीपक ढकाल, निर्वाचन क्षेत्र नम्बर १ का निर्वाचन अधिकृत कैलाश भट्टराई तथा प्रदेश निर्वाचन अधिकारी लालबहादुर गुरुङसँग छलफल गरेका थिए।

यसैक्रममा अर्थमन्त्री खनालले गुर्भाकोट नगरपालिकाको मेहलकुनास्थित निर्वाचन क्षेत्र नम्बर १ को निर्वाचन कार्यालयको पनि निरीक्षण गरेका थिए।

अनुगमनपछि अर्थमन्त्री खनालले सुर्खेतमा निर्वाचन तयारी सन्तोषजनक रूपमा अघि बढेको बताएका छन्। उनले निर्वाचनका क्रममा कुनै जोखिमयुक्त वातावरण नरहेको र स्थानीयस्तरमा राजनीतिक दल तथा उम्मेदवारहरूबीच स्वच्छ प्रतिस्पर्धाको वातावरण बनेको आफूले अनुभूत गरेको उल्लेख गरेका छन्।