काठमाडौं । काठमाडौंको राष्ट्रिय सभा गृहमा राष्ट्रिय आदिवासी जनजाति विकास प्रतिष्ठान (एनएफडिन)को आयोजना तथा काठमाडौँ महानगरपालिका, एफएओ नेपाल र डब्लुडब्लुएफ नेपालको सहकार्यमा आइतबार रजत जयन्ती तथा नेपाल आदिवासी ज्ञान सम्मेलन–२०८२ सुरु भएको छ। “ज्ञानको साझा प्रदान, धरोहरको संरक्षण, भविष्यको निर्माण” भन्ने नारासहित वि.सं. २०८२ माघ २५ देखि २७ गतेसम्म तीनदिने सम्मेलन सञ्चालन हुनेछ।

राष्ट्रपति रामचन्द्र पौडेलले उद्घाटन गर्दै सम्मेलनको औपचारिक शुभारम्भ गरेका छन्। कार्यक्रमले नेपालका आदिवासी जनजातिको मौलिक ज्ञान, संस्कृति, परम्परा र पहिचानलाई राष्ट्रिय तथा अन्तर्राष्ट्रिय स्तरमा उजागर गर्ने लक्ष्य राखेको छ।

कार्यक्रममा गृहमन्त्री ओमप्रकाश अर्यालले आदिवासी जनजातिको अधिकार सुनिश्चित गर्ने संविधानको मर्म अनुसार सरकार समावेशी नीति कार्यान्वयनमा कटिबद्ध रहेको बताएका छन्। राष्ट्रिय मानव अधिकार आयोगका अध्यक्ष तपबहादुर मगरले आदिवासी सांस्कृतिक, भाषिक र भौतिक ज्ञानको संरक्षण र प्रवद्र्धनमा राज्य र समुदायको सक्रिय भूमिका आवश्यक रहेको बताए।

प्रतिष्ठानका उपाध्यक्ष रेशम गुरुङले तीनदिने सम्मेलनमा आदिवासी ज्ञान, अधिकार, संस्कृति, नीति तथा अन्तर्राष्ट्रिय अभ्याससम्बन्धी बहस, प्रस्तुति र अनुभव आदान–प्रदान गरिने जानकारी दिए। नेपाल आदिवासी जनजाति महासंघ (नेफिन)का अध्यक्ष गेल्जे लामा शेर्पाले आदिवासी कला र संस्कृति लोप हुन नदिन राज्यको दायित्व रहने बताए।

सम्मेलनमा आदिवासी प्रथा, परम्परा, शासन प्रणालीका विषयमा ८१ वटा कार्यपत्र प्रस्तुत र छलफल गरिनेछ। यसैबीच विभिन्न क्षेत्रमा योगदान पुर्‍याएका व्यक्तित्वहरूलाई सम्मान पनि गरिएको छ। उद्घाटन कार्यक्रममा सुनुवार, भोटे र राउटे समुदायका सांस्कृतिक प्रस्तुतिहरू समावेश थिए। कार्यक्रम २७ गतेसम्म सञ्चालन हुनेछ।