काठमाडौं । विश्वप्रसिद्ध होम एप्लायन्स ब्रान्ड हायरको ब्रान्ड एम्बासडरका रूपमा नेपाली राष्ट्रिय क्रिकेट टिमका पूर्वकप्तान तथा नेपाल क्रिकेट सङ्घ (क्यान) का सचिव पारस खड्का नियुक्त भएका छन्। हायर ब्रान्डको नेपालका लागि आधिकारिक वितरक कम्पनी नियोटेरिक नेपालका सञ्चालक सञ्जय गोल्छा र खड्काबीच शुक्रबार सम्झौता पत्रमा हस्ताक्षर गरिएको हो।

बजार अनुसन्धान संस्था युरोमोनिटर इन्टरनेशनलका तथ्याङ्क अनुसार हायर बिक्री परिमाणका आधारमा विगत १७ वर्षदेखि निरन्तर विश्वकै नम्बर १ होम एप्लायन्स ब्रान्डको स्थानमा रहेको छ। सन् २०२५ को तथ्याङ्कअनुसार रेफ्रिजेरेटरतर्फ १८ वर्षदेखि, वासिङ मेसिनतर्फ १७ वर्षदेखि, वाइन कुलरतर्फ १६ वर्षदेखि, र फ्रिजर बिक्रीमा १५ वर्षदेखि अग्रस्थान कायम राख्दै आएको छ।

विश्वकै अग्रणी ब्रान्डका रूपमा हायरले अन्तर्राष्ट्रिय खेलकुदमा पनि लगानी गर्दै आएको छ। कम्पनीले लिभरपुल एफसी, पेरिस सेन्ट जर्मन, र एटीपी टुरसँग दीर्घकालीन साझेदारी गरेको छ। यही क्रममा आगामी दिनमा नेपालको खेलकुद क्षेत्रमा पनि हायरको उपस्थिति हुने अपेक्षा गरिएको छ।

सम्झौताका क्रममा क्रिकेटर पारस खड्काले हायरसँग जोडिन पाउनु महत्वपूर्ण अवसर भएको बताएका छन् भने नियोटेरिक नेपालका सञ्चालक सञ्जय गोल्छाले सहकार्यबाट सफलताको मार्गमा अघि बढ्ने विश्वास व्यक्त गरेका छन्।