काठमाडौँ । मध्यपूर्वमा जारी युद्धका कारण इन्धनमा भएको उच्च मूल्यवृद्धिले नेपाली अर्थव्यवस्था समेत प्रत्यक्ष प्रभावित भइरहेको छ । मध्यपूर्वको युद्ध अघि (फेब्रुअरी १५) डिजेल प्रतिलिटर रु. १ सय ३९ रहेकोमा हाल प्रतिलिटर रु. २ सय २५ र बिटुमिनको मूल्य प्रतिकेजी रु. ७५ बाट रु. १ सय ५५ पुगेको छ ।

निर्माण उद्योगमा प्रयोग हुने डिजेल, मट्टितेल, बिटुमिनसहितका निर्माण सामग्री तथा ढुवानी लागतमा उच्च वृद्धि हुँदा निर्माण उद्योग ठप्प हुने स्थितिमा पुगेको नेपाल निर्माण व्यवसायी महासङ्घले गराएको जानकारीले नेपाल उद्योग परिसङ्घलाई चिन्तित बनाएको छ । मूल्यवृद्धिको यस अवधिमा निर्माण व्यवसायीहरूलाई मात्रै रु. १० अरबभन्दा बढी नोक्सानी भइसकेको महासङ्घले जनाएको छ ।

निर्माण परियोजना प्रभावित हुँदा यससँग प्रत्यक्ष सरोकार राख्ने अन्य उद्योगहरूमा समेत शिथिलता आउन सक्ने भएकाले निर्माण व्यवसायीमाथि परेको आर्थिक तथा मानसिक दबाबलाई कम गर्न तथा समग्र अर्थतन्त्रलाई चलायमान बनाउन निर्माण व्यवसायीहरूको समस्यालाई उचित सम्बोधन गरिदिन परिसङ्घ सम्बन्धित सबै पक्षसँग अनुरोध गर्दछ ।