काठमाडौँ । नेपाल टेलिकमले चालू आर्थिक वर्ष २०८२/८३ को दोस्रो त्रैमासिक वित्तीय विवरण सार्वजनिक गरेको छ। कम्पनीका अनुसार सञ्चालन आयमा सामान्य वृद्धि भए पनि खुद मुनाफामा १२.९८ प्रतिशतको गिरावट देखिएको छ।

दोस्रो त्रैमाससम्म कम्पनीको कुल सञ्चालन आय १७ अर्ब २९ करोड ९७ लाख ३० हजार रूपैयाँ पुगेको छ, जुन गत आर्थिक वर्षको सोही अवधिको तुलनामा १.७३ प्रतिशत (२९ करोड ४८ लाख रूपैयाँ) बढी हो। तर, कुल आम्दानी भने १.५ प्रतिशतले घटेर १९ अर्ब २२ करोड ७२ लाख ६६ हजार रूपैयाँ कायम भएको टेलिकमले जनाएको छ।

कम्पनीले यो वर्षको दोस्रो त्रैमाससम्म खुद मुनाफा ४ अर्ब १६ करोड ४५ लाख ९ हजार रूपैयाँ मात्र भएको जनाएको छ, जुन गत वर्षको सोही अवधिको ४ अर्ब ७८ करोड ५९ लाख रूपैयाँको तुलनामा १२.९८ प्रतिशत कम हो। कर अघिको मुनाफा पनि ४.५९ प्रतिशत घटेर ५ अर्ब ९१ करोड ४३ लाख रूपैयाँ पुगेको छ। कम्पनीको प्रति शेयर आम्दानी ४६ रुपैयाँ २७ पैसा रहेको छ।

टेलिकमले मुनाफा घट्नुमा विभिन्न आन्तरिक र बाह्य कारणहरू जिम्मेवार भएको स्पष्ट पारेको छ। जसमा ह्वाट्सएप, भाइबर जस्ता ओटीटी सेवाहरूको बढ्दो प्रयोगले अन्तर्राष्ट्रिय आगमन कलमा कमी, बजारमा ब्याजदर घट्नु, लगानीको मूल्य परिवर्तन, कर्मचारी खर्च, कर र अन्य खर्चको वृद्धि समावेश छ।

प्रतिस्पर्धात्मक चुनौती र वित्तीय दबाबका बाबजुद, नेपाल टेलिकमले दुर्गम क्षेत्रमा सेवा विस्तार र गुणस्तर सुधारलाई निरन्तरता दिने प्रतिबद्धता जनाएको छ।