काठमाडौं ।काठमाडौं क्षेत्र नम्बर ३ मा चुनावी माहोल तातेको छ। रामेश्वर फुयाल, जो नेपाल कम्युनिष्ट पार्टी (एमाले) का तर्फबाट उम्मेदवार हुन्, घरदैलो अभियानमा व्यस्त देखिएका छन्। टोल–टोल पुगेर मतदातासँग प्रत्यक्ष संवाद गरिरहेका फुयाललाई स्थानीयवासीले आत्मीय स्वागत गर्दै विकासको निरन्तरताका लागि साथ दिने प्रतिबद्धता व्यक्त गरिरहेका छन्।

बागमती प्रदेश सरकारमा मन्त्री रहँदा पूर्वाधार निर्माण, सडक स्तरोन्नति, खानेपानी विस्तार, विद्यालय सुधार तथा स्वास्थ्य सेवा सुदृढीकरण जस्ता क्षेत्रमा सक्रिय पहल गरेका कारण उनी अहिले पनि जनतामाझ लोकप्रिय रहेको स्थानीयको भनाइ छ। “काम गर्ने नेताको रूपमा चिनिनुभएको छ,” एक स्थानीयले प्रतिक्रिया दिए।

घरदैलोका क्रममा फुयालले काठमाडौं–३ को समग्र विकासका लागि दीर्घकालीन योजना अघि सार्दै सुशासन, पारदर्शिता र युवामुखी कार्यक्रमलाई प्राथमिकतामा राख्ने बताएका छन्। जनताको सुझाव र आवश्यकतालाई नीति निर्माणमा समेट्ने प्रतिबद्धता उनले दोहोर्‍याएका छन्।

यसैबीच, ऊर्जा क्षेत्रका चर्चित व्यक्तित्व कुलमान घिसिङ पनि चुनावी चर्चामा रहेका छन्। राजनीतिक वृत्तमा काठमाडौं–३ मा फुयालको बढ्दो जनसमर्थनका कारण प्रतिस्पर्धा रोचक बन्दै गएको टिप्पणी भइरहेको छ।

काठमाडौं–३ मा देखिएको उत्साहपूर्ण सहभागिताले आगामी निर्वाचनमा कडा र प्रतिस्पर्धात्मक भिडन्त हुने संकेत दिएको छ।