काठमाडौं । पहिलो संस्करणको अपार सफलतापछि, सवारी साधन खरिद–बिक्री तथा अटोमोबाइल क्षेत्रमा भइरहेका आधुनिक प्रविधि विकासप्रति सवारीधनी, सम्भावित ग्राहक एवं आम सर्वसाधारणको बढ्दो रुचिलाई मध्यनजर गर्दै पर्यटकीय राजधानी पोखरा मा दोस्रो पटक ‘नाडा प्रेजेन्ट्स् वाडा अटो शो २०२६’ आयोजना हुने भएको छ।

नाडा अटोमोबाइल्स एशोसिएशन अफ नेपाल को प्रस्तुति तथा पश्चिमाञ्चल अटोमोबाइल डिलर्स एशोसिएसन को आयोजनामा उक्त अटो शो यही चैत ११ देखि १५ गतेसम्म पोखरा लेकसाइड, तालबाराही चोकस्थित खेल मैदानमा सञ्चालन गरिनेछ।

आयोजकका अनुसार साना, मझौला तथा ठूला सवारी साधन, पार्टपुर्जा, लुब्रिकेन्ट, टायर तथा अटोमोबाइल क्षेत्रसँग सम्बन्धित सम्पूर्ण व्यवसायी कम्पनीहरूलाई सहभागिताका लागि आह्वान गरिएको छ। प्रदर्शनीका लागि स्टल बुकिङ आज फागुन १२ गतेदेखि १९ गतेसम्म खुला गरिएको छ।

प्रदर्शनीको व्यवस्थापन ग्लोबल एक्स्पोजिशन एण्ड मेनेजमेन्ट सर्भिसेज प्रा.लि. ले गर्नेछ। स्टल बुकिङ गर्न इच्छुक कम्पनी वा संस्थाहरूले आयोजकसँग सम्पर्क गरी विस्तृत जानकारी लिन सक्नेछन्।

उक्त अटो शोले अटोमोबाइल बजारको प्रवर्द्धन, नयाँ प्रविधिको प्रदर्शन तथा व्यवसाय विस्तारमा टेवा पुर्‍याउने अपेक्षा गरिएको छ।