काठमाडौं। देशको सबैभन्दा ठूलो वाणिज्य बैंक नबिल बैंकले सस्तो ब्याजदरमा अटो लोन उपलब्ध गराउने भएको छ। बैंकले विद्युतीय तथा पेट्रोलियम दुबै प्रकारका प्यासेन्जर कार खरिदका लागि ५.९१ प्रतिशत ब्याजदरमै कर्जा दिने जनाएको हो।

बैंकका अनुसार ग्राहकले प्यासेन्जर कार खरिद गर्न कुल मूल्यको अधिकतम ६० प्रतिशतसम्म कर्जा लिन सक्नेछन्। बाँकी ४० प्रतिशत रकम डाउनपेमेन्टका रूपमा ग्राहकले आफैं व्यवस्था गर्नुपर्नेछ। कर्जाको अवधि अधिकतम ७ वर्षसम्म हुने व्यवस्था रहेको बैंकले जनाएको छ।

नबिल बैंकले ल्याएको यो अफर हालसम्मकै सबैभन्दा सस्तो अटो लोन योजनामध्ये एक भएको दाबी गरेको छ। पछिल्लो समय बैंकिङ प्रणालीमा लगानीयोग्य पूँजी बढ्नु र कर्जाको माग घट्नुका कारण बैंकहरूले ब्याजदर घटाउँदै लगेका छन्।

हाल अधिकांश वाणिज्य बैंकहरूले एकल अंकको ब्याजदरमै अटो लोन उपलब्ध गराउँदै आएका छन्, जसले सवारीसाधन खरिद गर्न चाहने ग्राहकलाई थप सहज बनाएको छ।