काठमाडौं, फागुन १४ — नेपाल एसबिआई बैंक लिमिटेडद्वारा सञ्चालित सामाजिक उत्तरदायित्व कार्यक्रम अन्तर्गत मधेश प्रदेशका ८०० भन्दा बढी गरिब तथा विपन्न वर्गका विद्यार्थीहरू लाभान्वित भएका छन्।

बैंकले बारा जिल्लाको जीतपुरसिमरास्थित श्री आदर्श आधारभूत विद्यालय, सर्लाहीको हरिवनस्थित श्री जनता प्राथमिक विद्यालय, सप्तरीको राजगढ र राजविराजस्थित श्री जनता माध्यमिक विद्यालय बेल्ही चपेना तथा श्री बौद्धिक अपाङ्गता विद्यालय र रौतहटको चन्द्रपुरस्थित श्री दलित जनजागरण आधारभूत विद्यालयका विद्यार्थीहरूलाई सहयोग प्रदान गरेको हो।

उक्त सहयोग अन्तर्गत बैंकले विद्यालयहरूमा व्हाइटबोर्ड, कुर्सी, स्टिल दराज, कार्यालय टेबुल, विद्यालय पोसाक, स्कुल ब्याग तथा विभिन्न शैक्षिक र खेलकुद सामग्रीहरू वितरण गरेको जनाएको छ। यस पहलले विद्यालयको शैक्षिक वातावरण सुधार हुनुका साथै विद्यार्थीहरूको पठनपाठनमा सहजता ल्याउने विश्वास बैंकले लिएको छ।

यस कार्यक्रममार्फत मधेश प्रदेशका विभिन्न विद्यालयमा अध्ययनरत ८०० भन्दा बढी विद्यार्थीहरू प्रत्यक्ष रूपमा लाभान्वित भएका छन्।

नेपाल एसबिआई बैंकले समुदाय स्तरमा सामाजिक उत्तरदायित्व अन्तर्गत यस्ता कार्यक्रमहरू नियमित रूपमा सञ्चालन गर्दै आएको जनाएको छ। विगत ३२ वर्षदेखि बैंकिङ सेवा प्रदान गर्दै आएको बैंकका हाल देशभर १०२ शाखा, २२ एक्स्टेन्सन काउन्टर, ७ प्रादेशिक कार्यालय, २१ शाखारहित बैंकिङ सेवा, १२७ एटीएम तथा एक कर्पोरेट कार्यालय सञ्चालनमा रहेका छन्।