काठमाडौं, फागुन १४ — निक्षेप तथा कर्जा सुरक्षण कोष र यूएनडीपीको सहकार्यमा एकल कृषि कर्जा सुरक्षण योजना सम्बन्धी कार्यशाला ललितपुरस्थित होटल स्क्वायरमा सम्पन्न भएको छ।

कार्यशालामा निक्षेप तथा कर्जा सुरक्षण कोष, यूएनडीपी तथा ‘क’ वर्गका वाणिज्य बैंकका उच्च व्यवस्थापन तहका पदाधिकारीहरूको सहभागिता रहेको थियो। कार्यक्रममा कृषि क्षेत्रमा लगानी अभिवृद्धि गर्न र सर्वसाधारणको कर्जामा पहुँच विस्तार गर्ने उद्देश्यले एकल (ऋणीगत) कर्जा सुरक्षण कार्यक्रम लागू गर्ने तयारीबारे छलफल गरिएको थियो।

कोष, यूएनडीपी तथा छनोट भएका नौ वटा स्थानीय तहहरूको संयुक्त योगदानमा छुट्टै कोष स्थापना गरी कृषि सम्बन्धित प्राथमिकता क्षेत्रहरूमा लगानी गर्ने नमुना परियोजना कार्यान्वयन प्रक्रियामा रहेको जनाइएको छ। सोही परियोजनाको कार्यान्वयनमा कर्जा प्रदायक वाणिज्य बैंकहरूको सुझाव संकलन गर्ने उद्देश्यले कार्यशाला आयोजना गरिएको हो।

कार्यक्रममा राष्ट्रिय वाणिज्य बैंक, कृषि विकास बैंक, ग्लोबल आइएमई बैंक, लक्ष्मी सनराइज बैंक, नेपाल एसबीआई बैंक, प्रभु बैंक, हिमालयन बैंक, एनएमबी बैंक लगायतका बैंकका उच्च व्यवस्थापकहरूले योजनाको मस्यौदामाथि सुझाव प्रस्तुत गरेका थिए।

कोषका प्रमुख कार्यकारी अधिकृत रमेश घिमिरेका अनुसार प्राप्त सुझावहरूलाई थप छलफल गरी उपयुक्त सुझाव समेटेर योजनालाई अन्तिम रूप दिइनेछ।

निक्षेप तथा कर्जा सुरक्षण कोषले उक्त योजना कृषि क्षेत्रमा लगानी प्रवर्द्धन तथा कर्जाको पहुँच विस्तारका लागि महत्वपूर्ण हुने विश्वास व्यक्त गरेको छ।