काठमाडौं । सुपर खुदी हाइड्रोपावर लिमिटेड ले सर्वसाधारणका लागि निष्काशन गरेको आईपीओको बाँडफाँड आज बिहान सम्पन्न गरेको छ। कम्पनीले फागुन ५ गतेदेखि ११ गतेसम्म सर्वसाधारणका लागि आईपीओ बिक्री खुला गरेको थियो भने धितोपत्र निष्काशन तथा बिक्री प्रबन्धक ग्लोबल आइएमई क्यापिटल लिमिटेड ले आज बिहान साढे ८ बजे बाँडफाँड गरेको हो।

कम्पनीले प्रतिकित्ता १०० रुपैयाँ अंकित मूल्यमा कुल ३१ लाख कित्ता आईपीओ निष्काशनको अनुमति पाएको थियो। यसमध्ये १५ लाख ५० हजार कित्ता आयोजना प्रभावित स्थानीयका लागि र १ लाख ५५ हजार कित्ता वैदेशिक रोजगारीमा रहेका नेपालीहरूका लागि यसअघि नै बाँडफाँड गरिसकिएको थियो।

त्यसैगरी, ७७ हजार ५०० कित्ता सामूहिक लगानी कोषहरूका लागि र ३१ हजार कित्ता कम्पनीका कर्मचारीहरूका लागि सुरक्षित गरी बाँकी रहेको १२ लाख ८६ हजार ५०० कित्ता सर्वसाधारणका लागि बिक्री खुला गरिएको थियो।

उक्त आईपीओमा २५ लाख ८० हजार ४७० जना योग्य आवेदकले कुल २ करोड ७७ लाख ३ हजार ८८० कित्ताका लागि आवेदन दिएका थिए। यो माग उपलब्ध शेयरभन्दा २१.५३ गुणा बढी भएकोले गोलाप्रथामार्फत बाँडफाँड गरिएको हो। साथै, ३९ हजार ८७१ जनाको आवेदन भने विभिन्न कारणले रद्द भएको थियो।

बाँडफाँड अनुसार १ लाख २८ हजार ६५० जना आवेदकले न्यूनतम १० कित्ताका दरले शेयर प्राप्त गरेका छन् भने २४ लाखभन्दा बढी आवेदकको हात खाली भएको छ। कम्पनीका अनुसार आईपीओको नतिजा केही समयमै सार्वजनिक गरिने जनाएको छ।