काठमाडौं । नेपालमा गाडी उत्पादन सम्भव छ भन्ने कल्पना केही वर्षअघिसम्म धेरैका लागि असम्भव जस्तै लाग्थ्यो। तर पछिल्ला दुई वर्षमा एउटा प्रयासले त्यो धारणा बदल्ने संकेत दिएको छ। देशको नवलपरासीको रामग्राममा स्थापना भएको हुन्डाईको एसेम्बली प्लान्टले नेपालमा चारपांग्रे सवारी साधन उत्पादनको नयाँ अध्याय सुरु गरेको छ।

नेपालका लागि हुन्डाईको आधिकारिक वितरक लक्ष्मी इन्टरकन्टिनेन्टलले लक्ष्मी मोटर कर्पोरेसनमार्फत नेपालमै सवारी साधन एसेम्बल गर्ने घोषणा गरेको करिब दुई वर्ष पूरा भएको छ। यो अवधिमा उक्त प्लान्टबाट करिब दुई हजार सवारी साधन उत्पादन भइसकेका छन्।

स्थानीय रूपमा एसेम्बल गरिएका हुन्डाई भेन्यु र हुन्डाई क्रेटा अहिले नेपाली सडकमा गुडिरहेका छन्। कम्पनीका अनुसार यीमध्ये क्रेटाको उत्पादन भेन्युको तुलनामा करिब दोब्बर बढी भएको छ।

स्थानीय उत्पादनका कारण सुरुवाती चरणमै भेन्यु गाडी करिब चार लाख रुपैयाँ कम मूल्यमा नेपाली उपभोक्तासम्म पुग्न सकेको थियो। उत्पादन सुरु भएको बेला तत्कालीन प्रधानमन्त्री पुष्पकमल दाहालले नवलपरासीस्थित प्लान्टको उद्घाटन गर्दै गाडी सार्वजनिक गरेका थिए।

नवलपरासीको रामग्राममा स्थापना गरिएको एसेम्बली प्लान्टलाई नेपालका लागि ऐतिहासिक उपलब्धिका रूपमा हेरिएको छ। आधुनिक प्रविधिसहित चारपांग्रे सवारी साधन एसेम्बल गर्ने यो देशकै पहिलो सुविधा सम्पन्न प्लान्ट हो।

यो केवल गाडी उत्पादनको परियोजना मात्र नभई औद्योगिक विकास, प्रविधि हस्तान्तरण र स्थानीय सीप विकाससँग जोडिएको प्रयास पनि हो। कम्पनीका अनुसार यस्तो उद्योगले आयात प्रतिस्थापन, रोजगारी सिर्जना, आन्तरिक राजस्व वृद्धि र सहायक उद्योग विकासका सम्भावना पनि बढाउँछ।

यस परियोजनाको अर्को महत्वपूर्ण पक्ष भनेको मानव स्रोत विकास हो। एसेम्बली प्लान्टमा कार्यरत प्राविधिक र इन्जिनियरहरू शतप्रतिशत नेपाली छन्।

कम्पनीका जनरल म्यानेजर दिपक थपलियाका अनुसार तीमध्ये धेरैजसो पहिले ट्रेडिङ, सेल्स वा सर्भिस क्षेत्रमा मात्र अनुभव भएका व्यक्तिहरू थिए। अहिले भने उनीहरू सेमी–रोबोटिक उपकरण सञ्चालन, गुणस्तर नियन्त्रण तथा उत्पादन प्रक्रिया व्यवस्थापनमा दक्ष प्राविधिकका रूपमा विकसित भइरहेका छन्।

एसेम्बली टेक्निक, प्रोसेस इन्जिनियरिङ र प्रिसिजन क्वालिटी एस्योरेन्स जस्ता सीपमा उनीहरूले प्रत्यक्ष अनुभव हासिल गरेका छन्, जुन अवसर यसअघि नेपालमा सहज रूपमा उपलब्ध थिएन।

दुई वर्षको अनुभवले नेपालमा अटोमोबाइल एसेम्बली उद्योगको सम्भावना देखाएको छ। यदि यस्ता परियोजनालाई निरन्तरता दिन सकियो भने भविष्यमा स्थानीय उत्पादन बढाउने, सहायक उद्योग स्थापना गर्ने र नेपाललाई अटोमोबाइल उत्पादनको सानो केन्द्र बनाउने सम्भावना पनि देखिन्छ।

हाललाई भने नवलपरासीको यो प्लान्टले एउटा सन्देश दिएको छ—नेपालमा गाडी केवल आयात गरेर मात्र होइन, उत्पादन गरेर पनि सडकमा उतार्न सकिन्छ।