काठमाडौँ। राइड–हेलिङ सेवा प्रदायक याङ्गोले आफ्ना महिला पार्टनर चालक तथा कुरियरहरूलाई लक्षित गर्दै काठमाडौंमा वित्तीय साक्षरता कार्यक्रम आयोजना गरेको छ। कम्पनीले आफ्नो चालक समुदायलाई सशक्त बनाउने उद्देश्यसहित उक्त कार्यक्रम सञ्चालन गरेको जनाएको छ।

कार्यक्रममार्फत सहभागीहरूलाई व्यक्तिगत वित्त व्यवस्थापनका लागि आवश्यक व्यवहारिक ज्ञान र उपयोगी उपकरण प्रदान गरिएको थियो। बजेट निर्माण, बचत, वित्तीय योजना तथा दीर्घकालीन आर्थिक आत्मनिर्भरता जस्ता विषयमा प्रशिक्षण दिइएको थियो।

याङ्गोका अनुसार राइड–हेलिङ क्षेत्रमा कार्यरत महिला चालकहरूले अनियमित आम्दानी तथा वित्तीय स्रोतमा सीमित पहुँच जस्ता चुनौतीहरू सामना गर्ने गर्छन्। यस कार्यक्रमले यस्ता समस्या समाधान गर्दै उनीहरूको आर्थिक अवस्था सुदृढ बनाउन सहयोग पुर्‍याउने लक्ष्य राखिएको छ।

उक्त सत्र फाइनान्सियल एक्स्पर्ट ग्रेस रौनियारद्वारा सञ्चालन गरिएको थियो, जहाँ महिला चालक तथा कुरियरहरूको दैनिक आवश्यकतालाई ध्यानमा राखेर व्यावहारिक सुझावहरू प्रदान गरिएको थियो।

कार्यक्रमका बारेमा याङ्गोका कन्ट्री म्यानेजर सन्तोष पाण्डेले महिला चालकहरूको आर्थिक सशक्तिकरण कम्पनीको प्राथमिकतामा रहेको उल्लेख गर्दै वित्तीय साक्षरता कार्यक्रममार्फत सुरक्षित आर्थिक भविष्य निर्माणमा सहयोग गर्ने उद्देश्य रहेको बताए।

कम्पनीले यसलाई आफ्ना बजारहरूमा समुदाय सशक्तिकरण अभियानको एक हिस्सा भएको जनाउँदै महिला आर्थिक सशक्तिकरणमा योगदान पुर्‍याउने प्रतिबद्धता दोहोर्‍याएको छ।