काठमाडौंमा नेपाल बैंक लिमिटेड र बि एण्ड बि हस्पिटल प्रा.लि. बीच उपचार सेवामा विशेष छुट प्रदान गर्ने सम्बन्धी सम्झौता भएको छ।

सम्झौताअनुसार नेपाल बैंकमा खाता रहेका ग्राहक तथा बैंकका कर्मचारीहरूले बि एण्ड बि हस्पिटलमा उपचार गराउँदा नेपाल बैंकको मोबाइल बैंकिङ एपमार्फत भुक्तानी गरेमा विभिन्न स्वास्थ्य सेवामा लाग्ने शुल्कमा १५ प्रतिशतसम्म छुट पाउनेछन्।

सम्झौतापत्रमा बैंकका बजारीकरण तथा अनुसन्धान डिभिजन प्रमुख निर्मल सुवेदी र बि एण्ड बि हस्पिटलका प्रशासन प्रमुख प्रकाशकुमार भट्टराईले हस्ताक्षर गरेका हुन्। बैंकका अनुसार यस सहकार्यबाट ग्राहक र कर्मचारीले सहुलियतपूर्ण स्वास्थ्य सेवा प्राप्त गर्ने अपेक्षा गरिएको छ।

नेपाल बैंकले हाल देशभर २३१ शाखा, २४६ एटीएम र ६१ एक्सटेन्सन काउन्टरमार्फत करिब २७ लाख ग्राहकलाई सेवा दिँदै आएको जनाएको छ। बैंकले आधुनिक प्रविधिमार्फत छिटो, सरल र गुणस्तरीय बैंकिङ सेवा विस्तार गर्दै प्रतिस्पर्धात्मक रूपमा अघि बढिरहेको उल्लेख गरेको छ।