काठमाडौं । कामना सेवा विकास बैंक लिमिटेड ले आफ्नो संस्थागत सामाजिक उत्तरदायित्वअन्तर्गत शाखा कार्यालय वालिङमार्फत श्री बाल शिक्षा निकेतन आधारभूत विद्यालय मा अध्ययनरत विपन्न विद्यार्थीहरूलाई स्टेशनरी सामग्री वितरण गरेको छ।

बैंकका पोखरा क्षेत्र प्रमुख शिवकुमार ढकालले विद्यालयका विद्यार्थीलाई कापी, कलमलगायत विभिन्न शैक्षिक सामग्री हस्तान्तरण गर्नुभएको हो। कार्यक्रममा नर्सरीदेखि कक्षा ८ सम्म अध्ययनरत १०० भन्दा बढी विद्यार्थीलाई आवश्यक स्टेशनरी सामग्री वितरण गरिएको बैंकले जनाएको छ।

कार्यक्रममा विद्यालय व्यवस्थापन समितिका अध्यक्ष विमल अर्यालले बैंकले गरेको सहयोगप्रति आभार व्यक्त गर्दै यस्ता सामग्रीले विद्यार्थीहरूको सिकाइ प्रक्रियालाई सहज र प्रभावकारी बनाउन मद्दत पुग्ने बताउनुभयो। उहाँले सामुदायिक विद्यालयका विद्यार्थीहरूको मनोबल वृद्धि गर्न यस्ता कार्यक्रमले सकारात्मक भूमिका खेल्ने धारणा राख्नुभयो।

बैंकका क्षेत्र प्रमुख ढकालले पनि यस्ता सहयोगले विद्यार्थीहरूको पठनपाठनमा थप प्रेरणा र सहजता मिल्ने विश्वास व्यक्त गर्नुभयो। कार्यक्रममा बैंकका कर्मचारी, विद्यालय व्यवस्थापन समिति, शिक्षक तथा विद्यार्थीहरूको सहभागिता रहेको थियो।

बैंकले आगामी दिनमा पनि सरोकारवालासँगको सहकार्यमा यस्ता सामाजिक तथा साक्षरता कार्यक्रमलाई निरन्तरता दिने जनाएको छ।