काठमाडौं । सिटिजन लाइफ इन्स्योरेन्स कम्पनी लिमिटेड प्रतिष्ठित अन्तर्राष्ट्रिय पुरस्कार ‘६औँ इमर्जिङ एसिया इन्स्योरेन्स अवार्ड्स २०२५’ अन्तर्गत नेपालकै उत्कृष्ट विधा ‘बेस्ट लाइफ इन्स्योरेन्स कम्पनी अफ द इयर – नेपाल’ बाट सम्मानित भएको छ ।

यो पुरस्कार इन्डियन च्याम्बर अफ कमर्स द्वारा थाइल्यान्डको बैंकक मा आयोजित भव्य समारोहबीच घोषणा गरिएको हो ।

आयोजकबाट प्राप्त आधिकारिक ट्रफी तथा प्रमाणपत्र कम्पनीको केन्द्रीय कार्यालयमा हर्षोल्लासका साथ ग्रहण गरिएको कम्पनीले जनाएको छ ।

कम्पनीका अनुसार उक्त सम्मानले सिटिजन लाइफको सुदृढ वित्तीय अवस्था, उत्कृष्ट ग्राहक सेवा, परिष्कृत डिजिटल प्रविधि तथा आम नागरिकमाझ जीवन बीमाको पहुँच विस्तारमा खेलेको नेतृत्वदायी भूमिकालाई अन्तर्राष्ट्रिय स्तरमा पुनः प्रमाणित गरेको छ ।

यस अवसरमा कम्पनीका प्रमुख कार्यकारी अधिकृतले ग्राहकहरूको अटुट विश्वास, अभिकर्ता तथा कर्मचारीहरूको मेहनतकै प्रतिफलस्वरूप यो सफलता प्राप्त भएको बताएका छन् । उनले यो सम्मान सम्पूर्ण सिटिजन परिवार र शुभचिन्तकहरूमा समर्पित रहेको उल्लेख गरे ।

कम्पनीले आगामी दिनमा पनि आफ्ना सेवाहरूलाई अझ सुरक्षित, भरपर्दो, आधुनिक तथा प्रविधिमैत्री बनाउँदै हरेक नेपालीको सुख–दुःखको सारथी बन्ने प्रतिबद्धता व्यक्त गरेको छ ।