काठमाडौँ । एनआई सी एशिया बैंकले आफ्नो संस्थागत सामाजिक उत्तरदायित्वअन्तर्गत सुर्खेतको वीरेन्द्रनगर–१, धारापानीस्थित श्री नेपाल राष्ट्रिय प्राथमिक विद्यालयमा पानी ट्यांकी तथा मोटर जडान गरी हस्तान्तरण गरेको छ। विद्यालयमा स्वच्छ खानेपानीको उचित व्यवस्थापन मिलाई विद्यार्थीहरूका लागि सहज शैक्षिक तथा स्वास्थ्य अनुकूल वातावरण सिर्जना गर्ने उद्देश्यका साथ बैंकले उक्त सहयोग उपलब्ध गराएको हो।

१६७ जनाभन्दा बढी विद्यार्थीहरू अध्ययनरत यस विद्यालयका लागि बैंकका कर्णाली सर्कल हेड जीवन शाहीले विद्यालय व्यवस्थापन समितिका अध्यक्ष सुशिला सुनारलाई एक विशेष कार्यक्रमका बीच उक्त पानी ट्यांकी र मोटर हस्तान्तरण गर्नुभयो। २०८३ ज्येष्ठ ८ गते आयोजित सो सहयोग हस्तान्तरण कार्यक्रममा वीरेन्द्रनगर नगरपालिका वडा नम्बर १ का वडा अध्यक्ष दिनेश खत्री, विद्यालय व्यवस्थापन समितिका प्रतिनिधिहरू, शिक्षक, शिक्षिका, विद्यार्थी तथा बैंकका स्थानीय कर्मचारीहरूको उल्लेख्य उपस्थिति रहेको थियो।

बैंकले उपलब्ध गराएको उक्त सहयोगका कारण विद्यालयमा स्वच्छ र सफा खानेपानीको व्यवस्थापन अझ प्रभावकारी हुने विश्वास लिइएको छ। यसबाट विद्यार्थी तथा शिक्षकहरूको स्वास्थ्यमा सकारात्मक सुधार आउने र दैनिक रूपमा पिउने पानीको समस्या टर्ने हुँदा विद्यालयको समग्र शैक्षिक वातावरण थप सहज र अनुकूल बन्ने बैंकका सहायक प्रमुख कार्यकारी अधिकृत एवं प्रमुख सूचना अधिकारी जयन्द्र रावलद्वारा जारी प्रेस विज्ञप्तिमा उल्लेख गरिएको छ।