काठमाडौँ । सिद्धार्थ बैंक लिमिटेडले गण्डकी प्रदेशको तनहुँ जिल्लास्थित १२ वटा सामुदायिक विद्यालयहरूलाई एक–एक थान इन्टरएक्टिभ डिस्प्ले स्मार्ट बोर्ड हस्तान्तरण गरेको छ। बैंकले आफ्नो संस्थागत सामाजिक उत्तरदायित्वअन्तर्गत शिक्षा क्षेत्रमा सूचना तथा सञ्चार प्रविधिको प्रयोगलाई प्रवर्द्धन गर्दै सामुदायिक विद्यालयका विद्यार्थीहरूलाई आधुनिक एवं गुणस्तरीय शिक्षासँग जोड्ने उद्देश्यले उक्त प्रविधिमैत्री सहयोग उपलब्ध गराएको हो।

यो हस्तान्तरण कार्यक्रम २०८३ जेठ ११ गते तनहुँको श्री नारायणी आधारभूत विद्यालयको सभाहलमा सम्पन्न भएको थियो। सो विशेष समारोहमा सिद्धार्थ बैंकका गण्डकी प्रदेश प्रमुख निरज श्रेष्ठ, दमौली शाखा प्रबन्धक दिपक पौडेल, डुम्रे शाखा प्रबन्धक सुधिर वाग्ले, विद्यालय व्यवस्थापन समितिका अध्यक्ष राजु सिम्खडा, यू.डब्लु.एस. नेपालका प्रतिनिधिहरू सहित विभिन्न विद्यालयका शिक्षक, अभिभावक तथा विद्यार्थीहरूको उल्लेखनीय उपस्थिति रहेको थियो।

बालबालिकाहरू राष्ट्रका कर्णधार हुन् र राष्ट्रको उज्ज्वल भविष्य उनीहरूले हासिल गर्ने ज्ञान र सीपमा निर्भर हुन्छ भन्ने मान्यतालाई आत्मसात् गर्दै बैंकले यो कदम चालेको हो। यस प्रविधिमैत्री कार्यबाट तनहुँका १२ वटा सामुदायिक विद्यालयमा अध्ययनरत प्रत्येक वर्ष १५ सयभन्दा बढी विद्यार्थीहरू प्रत्यक्ष रूपमा लाभान्वित हुने अपेक्षा गरिएको छ। यो नयाँ प्रविधिले परम्परागत कक्षाकोठाको शिक्षण विधिलाई पूर्ण रूपमा परिवर्तन गरी दृश्यात्मक र अन्तरक्रियात्मक बनाउनेछ। भिडियो, चित्र तथा विभिन्न डिजिटल सामग्रीको प्रयोगबाट विद्यार्थीहरूले विषयवस्तु सहज रूपमा बुझ्न सक्ने भएकाले शिक्षण र सिकाइ प्रक्रिया अझ रोचक, आधुनिक र प्रभावकारी बन्ने विश्वास बैंकले लिएको छ।

सिद्धार्थ बैंकले संयुक्त राष्ट्रसङ्घको दिगो विकास लक्ष्यलाई सधैँ आफ्नो उच्च प्राथमिकतामा राखी समाजको चौतर्फी विकासमा टेवा पुर्‍याउने उद्देश्य लिँदै आएको छ। स्वास्थ्य, शिक्षा, वातावरण लगायतका विभिन्न सामाजिक कार्यहरूमा लामो समयदेखि सक्रिय सहभागिता जनाउँदै आएको यस बैंकले आगामी दिनहरूमा पनि यस्ता शिक्षा र प्रविधि लक्षित सामाजिक कार्यहरूलाई निरन्तरता दिँदै जाने योजना बनाएको छ।