कामना सेवा विकास बैंक लिमिटेडले आफ्नो संस्थागत सामाजिक उत्तरदायित्व अन्तर्गत शाखा कार्यालय कोटिहवामार्फत रूपन्देहीको श्री पशुपति माध्यमिक विद्यालयलाई कुलर हस्तान्तरण गरेको छ। बैंकको बुटवल क्षेत्र प्रमुख हेमन्तबाबु आचार्यले विद्यालयका प्रधानाध्यापक वेद नारायण भट्टराईलाई तीन थान कुलर हस्तान्तरण गर्नुभएको हो।

जेहेन्दार तथा गरिब विद्यार्थीहरू अध्ययनरत उक्त विद्यालयमा गर्मी मौसमका कारण अध्ययन-अध्यापनमा कठिनाइ भइरहेको अवस्थालाई मध्यनजर गर्दै बैंकले यो सहयोग उपलब्ध गराएको हो।

कुलर जडान भएपछि कक्षाकोठाभित्रको तापक्रम न्यूनीकरण भई विद्यार्थीहरूलाई सहज र अनुकूल वातावरणमा अध्ययन गर्न मद्दत पुग्ने अपेक्षा प्रधानाध्यापक भट्टराईले व्यक्त गर्नुभयो। यस प्रकारको सहयोगले विद्यार्थीहरूको पठनपाठनमा थप सहजता र प्रेरणा मिल्ने विश्वास बैंकका बुटवल क्षेत्र प्रमुख आचार्यले प्रकट गर्नुभयो।

जेठ १३ गते आयोजित उक्त हस्तान्तरण कार्यक्रममा बैंकका कर्मचारीहरू, विद्यालयका प्रधानाध्यापक, शिक्षक तथा विद्यार्थीहरूको उपस्थिति रहेको थियो। बैंकले आगामी दिनहरूमा पनि सरोकारवालाहरूको समन्वय तथा सहकार्यमा यस्ता सामाजिक र साक्षरतामूलक कार्यक्रमहरूलाई निरन्तरता दिने प्रतिबद्धता जनाएको छ।