एनआईसी एशिया बैंकले आफ्नो लगानी पोर्टफोलियो विविधीकरण गर्ने क्रममा जलविद्युत क्षेत्रमा लगानी विस्तारलाई तीव्र बनाएको छ। यसै सिलसिलामा बैंक र रसुवा हाइड्रोपावर लिमिटेडबीच रसुवा जिल्लाको नौकुण्ड गाउँपालिकामा निर्माण हुने ७.२९ मेगावाट उत्पादन क्षमताको फलाखु खोला जलविद्युत आयोजनामा ९५ करोड २० लाख रुपैयाँ लगानी गर्नेसम्बन्धी द्विपक्षीय समझदारीपत्रमा हस्ताक्षर भएको छ।

एक विशेष कार्यक्रमका बीच उक्त समझदारीपत्रमा बैंकका तर्फबाट सहायक प्रमुख कार्यकारी अधिकृत जयन्द्र रावल र रसुवा हाइड्रोपावर लिमिटेडका तर्फबाट अध्यक्ष दीपक थापाले हस्ताक्षर गर्नुभएको हो।

नेपाल सरकारको स्वच्छ ऊर्जा उत्पादनको राष्ट्रिय लक्ष्यलाई टेवा पुर्‍याउँदै दिगो ऊर्जा विकासमा महत्वपूर्ण आयाम थप्ने विश्वास गरिएको यो आयोजना आगामी दुई वर्षभित्र सम्पन्न गर्ने लक्ष्य राखिएको छ। निर्माण सम्पन्न भएपछि यस आयोजनाबाट वार्षिक करिब ३८.७४ गिगावाट प्रतिघण्टा (GWh) विद्युत उत्पादन हुनेछ।

एनआईसी एशिया बैंकको एकल नेतृत्वमा लगानी सुनिश्चित भएको यस जलविद्युत आयोजनाको सफल निर्माणपश्चात मुलुकको राष्ट्रिय प्रसारण प्रणालीमा थप स्वच्छ ऊर्जा थपिने र यसले मुलुकको समग्र आर्थिक वृद्धि एवं वातावरणीय सन्तुलन कायम राख्न ठूलो योगदान पुर्‍याउने विश्वास बैंकले लिएको छ।