काठमाडौं, असार ४ — ९० को दशकका लोकप्रिय बलिउड पार्श्वगायक Abhijeet Bhattacharya पहिलो पटक नेपालमा लाइभ प्रस्तुति दिन आउने भएका छन्। “लाइभ कन्सर्ट इन नेपाल — अभिजीत भट्टाचार्य” आगामी जुन २०, २०२६ मा काठमाडौंको ठमेलस्थित क्लब नोभामा आयोजना हुने भएको छ।

आयोजकका अनुसार कार्यक्रमको प्रवेशद्वार साँझ ७:०० बजे खुल्नेछ भने कन्सर्ट ७:३० बजेबाट सुरु हुनेछ। अभिजीतले आफ्नो सांगीतिक यात्राका चर्चित तथा सदाबहार हिन्दी गीतहरू प्रस्तुत गर्नेछन्। साथै नेपाली दर्शक–श्रोताको मन जितेका केही नेपाली गीतहरू पनि गाउने तयारी रहेको जनाइएको छ।

‘मै कोई ऐसा गीत गाऊँ’, ‘तुम दिल की धड़कन में रहते हो’ लगायत उनका लोकप्रिय गीतहरूले एक समय बलिउड संगीतमा विशेष छाप छोडेका थिए। कार्यक्रममा भारतका ए-क्लास संगीतकारहरूको टोलीले पनि साथ दिने आयोजकले जनाएको छ।

कन्सर्टको आयोजना Nepal Sangitik Sangh ले गरेको हो भने व्यवस्थापनको जिम्मेवारी Sadhana Kala Kendra ले सम्हालेको छ। कार्यक्रम बीबीटीएम फाउन्डेसनको हितमा आयोजना गरिएको परोपकारी (च्यारिटी) कन्सर्ट रहेको बताइएको छ।

कार्यक्रमको आधिकारिक टिकटिङ पार्टनर cityPAY रहेको छ। हाल अर्ली बर्ड टिकट बिक्री खुला गरिएको छ। अर्ली बर्ड अफरअन्तर्गत स्ट्यान्डिङ डान्सिङ फ्लोरको टिकट मूल्य रु. २,००० र स्ट्यान्डिङ भीआईपी फ्लोरको टिकट रु. ४,००० तोकिएको छ। साथै VIP, VVIP तथा विभिन्न टेबल प्याकेजहरू पनि उपलब्ध छन्।

आयोजकले अर्ली बर्ड टिकट सीमित अवधिका लागि मात्र उपलब्ध हुने जानकारी दिँदै संगीतप्रेमीहरूलाई समयमै टिकट सुरक्षित गर्न आग्रह गरेको छ। टिकट खरिदका लागि cityPAY Ticket Link मार्फत KYC प्रक्रिया पूरा गरी टिकट लिन सकिनेछ।