काठमाडौं। सरकारले कर प्रणालीलाई थप पारदर्शी र प्रभावकारी बनाउने उद्देश्यले ‘सक्कली बिल लिनुहोस्, लखपति बन्नुहोस्’ अभियान सञ्चालन गर्ने भएको छ। योजनाअन्तर्गत सक्कली बिल लिने उपभोक्तामध्ये हरेक दिन एक जनालाई एक लाख रुपैयाँ तथा महिनामा दुई जनालाई १०–१० लाख रुपैयाँ बम्पर पुरस्कार प्रदान गरिनेछ।

सरकारले सार्वजनिक गरेको व्यवस्थाअनुसार मूल्य अभिवृद्धि कर (भ्याट) तथा स्थायी लेखा नम्बर (प्यान) प्रणालीमा आबद्ध व्यवसायबाट १०० रुपैयाँभन्दा बढीको सामान वा सेवा खरिद गरी सक्कली बिल लिने उपभोक्ता योजनामा सहभागी हुन सक्नेछन्। नगद वा अनलाइन माध्यमबाट गरिएको भुक्तानी दुवै यस योजनाका लागि मान्य हुनेछन्।

उपभोक्ताले खरिदपछि प्राप्त गर्ने सक्कली बिलमा उल्लेखित बिल नम्बर नै पुरस्कार योजनाको आधार हुनेछ। सरकारले हाललाई प्रत्येक महिनाको १६ गते र महिनाको अन्तिम दिन (पाक्षिक रूपमा) विजेताको घोषणा गर्ने जनाएको छ।

यो कार्यक्रम आर्थिक वर्ष २०८३/८४ को बजेटमार्फत घोषणा गरिएको थियो। सरकारले यस योजनाबाट उपभोक्तामा सक्कली बिल लिने बानीको विकास हुनुका साथै कर छलि नियन्त्रण, कारोबारको पारदर्शिता वृद्धि र राजस्व संकलनमा सकारात्मक प्रभाव पर्ने अपेक्षा गरेको छ।

सरकारले योजनाको विस्तृत कार्यान्वयन प्रक्रिया तथा सहभागी हुने मापदण्ड कार्यविधिमार्फत सार्वजनिक गरेको छ।